gambella educational media

በጋምቤላ ክልል የትምህርት ሥራውን ውጤታማ ለማድረግ የባለድርሻ አካላት ሚና ሊጠናከር እንደሚገባ ተገለፀ። በክልሉ የ2017 ዓ.ም የትምህርት ዘመን የመማር ማስተማር ሂደት በዛሬው ዕለት ተጀምሯል፡፡ መስከረም 7/2017 ዓ.ም(የጋምቤላ ክልል ትምህርት ቢሮ) የክልሉ ርዕሰ መስተዳድር ተወካይ አቶ ማበር ኮር እንዳሉት የትምህርት ጥራትን የማረጋገጡ ስራ ለመንግስት ብቻ የሚተው አለመሆኑን ተናግረዋል፡፡ በክልሉ የትምህርት ቤቶችን መሰረተ ልማት ለማሻሻል የህብረተሰቡ ድጋፍና እገዛ ሊጠናከር እንደሚገባ ገልፀዋል። የትምህርት ጥራትን ለማረጋገጥ ለተጀመረው ጥረት መሳካት የክልሉ መንግስት አስፈላጊውን ድጋፍ እንደሚያደርግ አስታውቀዋል። የ2017 ዓ.ም የትምህርት ዘመን ውጤታማ እንዲሆን የትምህርት ዘርፍ አመራሮች፣ መምህራን እና ወላጆች በቅንጅት እንዲሰሩም አቶ ማበር አሳስበዋል። የክልሉ ትምህርት ቢሮ ምክትል ሃላፊ አቶ ፖክ ካዊች በበኩላቸው በ2017 የትምህርት ዘመን የትምህርት ጥራትና ፍትሃዊነት እንዲረጋገጥ ቢሮው ከባለድርሻ አካላት ጋር በጋራ ይሰራል ብለዋል። በትምህርት ዘመኑ የትምህርት ቁሳቁስ እጥረት እንዳይኖርና ተማሪዎች ከትምህርት ገበታቸው እንዳይቋረጡ የድጋፍ ስራዎችን እንደሚሰሩ  አስረድተዋል። በማስጀመሪያ መርሃ-ግብሩ ላይ የተገኙት ወላጆች እንዳሉት የተማሪዎች የውጤት ማጣት በትምህርት ዘመኑ እንዳይኖር ትምህርት ቤቶች በአግባቡ እንዲያስተምሩ ጠይቀዋል። ተማሪዎች ከትምህርት ቤት መማር ማስተማር ሂደት በተጨማሪ ወደ ቤታቸው ሲመጡ እንዲያጠኑ የክትትል ስራዎችን እንደሚያከናዉኑ ወላጆቹ አረጋግጠዋል። በዕለቱም የትምህርት ቁሳቁስ መግዛት ለማይችሉ ተማሪዎች ድጋፍ ተደርጓል። @ከጋምቤላ ክልል የመንግስት ኮሙኒኬሽን ጉዳዮች ጽህፈት ቤት

የ12ኛ ክፍል ሀገር አቀፍ ፈተና ተፈታኞች ውጤታችሁን በሚከተሉት  የውጤት መግለጫ አማራጮች ከጳጉሜ 4 ቀን ከሌሊቱ 6፡00 ሰዓት ጀምሮ ማየት ትችላላችሁ። (ጷጉሜ 4/2016 ዓ.ም) 1. ፖርታል፡- https://result.eaes.et 2. በቴሌግራም ቦት (Telegram Bot):- https://t.me/EAESbot 3. በአጭር የጽሑፍ መልዕክት (SMS)፡- 6284 ላይ ‘R’ን በማስቀደም የመለያ ቁጥር በማስገባት (ምሳሌ R1234567) መልዕክት በመላክ ውጤትዎን ማወቅ ይችላሉ፡፡ ይህ አማራጭ ኢትዮ ቴሌኮም የሚያስከፍለው መደበኛ የSMS ክፍያ ይኖረዋል። ከውጤት መግለጫ ፖርታልና ቴሌግራም ቦት ላይ ጊዜያዊ ሰርቲፊኬት ማውረድና ማታም ይችላል፡፡ በተጨማሪም ተፈታኞች በውጤት እና ተያያዥ በሆኑ ጉዳዮች ላይ ቅሬታ ካላቸው  ወደ አገልግሎቱ ቢሮ በአካል መምጣት ሳያስፈልግ ከSMS በስተቀር በውጤት መግለጫ አማራጮቹ ላይ Compliant የሚለውን በመጫን የቅሬታቸውን ዓይነት በተዘጋጀ የቅሬታ ፎርም ላይ በትክክል በመሙላት ማቅረብ ይችላሉ። የቅሬታቸውን ምላሽ ቅሬታቸውን ባቀረቡበት ተመሳሳይ አድራሻ የሚሰጥ  ይሆናል። የትምህርት ምዘናና ፈተናዎች አገልግሎት

የጋምቤላ ክልል ትምህርት ቢሮ 13ኛውን ክልል አቀፍ የትምህርት ጉባኤ "በተደራጀ የህዝብ ተሳትፎ የትምህርት ጥራትን ማረጋገጥ"በሚል መሪ ቃል ያካሂዳል። (ነሀሴ 28/2016 ዓ.ም) ጉባኤው ነገን ጨምሮ ለሁለት ቀናት የሚካሄድ ሲሆን በ2016 የትምህርት ዘመን በትምህርት ዘርፉ የተመዘገቡ ውጤቶችን እና ተግዳሮቶችን በመገምገም በ2017 የትምህርት ዘመን የሚተገበሩ ስራዎች ላይ ተወያይቶ የትኩረት አቅጣጫዎችን የሚያስቀምጥ ይሆናል፡፡