ከዚህም ከዚያም( kezihm keziyam)👩‍👦‍👦👨‍👨‍👦🧵

አስተሳሰብን መቆጣጠር አስተሳሰብን መቆጣጠር ማለት ወደ እኔ የሚመጣውን ወይም በውስጤ የሚፈጠረውን ሃሳብ በማጣራት ማስተናገድ ማለት ነው፡፡ አስተሳሰባችንን ሳንለውጥ ሕይወታችንንም ሆነ ሁኔታችንን መለወጥ አንችልም፡፡ ይህ የሚሆንበት ምክንያት የሁሉ ነገር መጀመሪያ አስተሳሰብ ስለሆነና አስተሳሰባችን የማንነታችን “ወፍጮ” በመሆኑ ነው፡፡ በመጀመሪያ አንድ ሃሳብ ወደ አእምሮአችን ይገባል፡፡ በመቀጠልም ይህ ሃሳብ በውስጣችን ይብላላና በንግግርና በተግባር መገለጥ ይጀምራል፡፡ ይህ ተግባር ወደ ልማድ ከተለወጠ በኋላ ፍጻሜአችንን የመለወጥና የመቅረጽ ጉልበት ይኖረዋል፡፡ ይህ ሃሳብ ጤናማም ሆነ ጤና ቢስ ሂደቱ ያው አንድ ነው፡፡ ጤና ቢስ አመለካከቶችን ለማስወጣት መውሰድ የምትችላቸው እርምጃዎች፡- 1. በሕይወትህ የምታሰላስላቸውን ሃሳቦች ለይተህ እወቅ፡፡ ለማንነትህና ለሕይወትህ አላማ የሚመጥኑ ሃሳቦች ምን እንደሆኑ ለይተህ ማወቅ አለብህ፡፡ ይህንን ለይተህ ስታውቅ በሃሳቦች መካከል መለየትንና የትኛውን ማስተናገድ እንዳለብህ ጥርት ባለ መልኩ እንድታውቅ ይረዳሃል፡፡ 2. ጤና ቢስ አስተሳሰቦችን አታስተናግዳቸው፡፡ የመጣ ሃሳብ ሁሉ በአእምሮህ ስፍራ ማግኘት የለበትም፡፡ ለእምነትህና ላስቀመጥከው የሕይወት ከፍታ የማይመጥነውን ተራ ሃሳብ በመጣበት ፍጥነት እንዲወጣ ተቃወመው፡፡ ይህንንም ልምምድ የዘወትር አድረገው፡፡ 3. ጤና ቢሱን አስተሳሰብ በጤናማ አስተሳሰብ ቀይር፡፡ ከዚህ በፊት በውስጥህ ያስተናገድካቸውን ጤና ቢስ ሃሳቦች መልካምና ስኬታማ በሆኑ ጤናማ ሃሳቦች መለወጥ መጀመር አለብህ፡፡ ከአእምሮህ ክፉውን ሃሳብ አስወጥተህ በጤናማው ካልተካኸው ሌላ ሃሳብ መሙላቱ

ቂም መያዝ ቂም የምትይዢ ከሆነ የምትጎጂው ራስሽን ነው። ቂም መያዝ ራስን በጥፊ እየመቱ ሕመሙን ሌላ ሰው እንዲሰማው ከመጠበቅ ተለይቶ አይታይም።“ቂም የያዛችሁበት የቤተሰብ አባል ስለ ጉዳዩ ምንም ስለማያውቅ በደስታ ሕይወቱን መምራቱን ቀጥሎ ይሆናል፤ ምናልባትም እናንተ የምታሳዩት ስሜት ምንም አልረበሸው ይሆናል።” ዋናው ነጥብ ምንድን ነው? “ቂም የሚያደርስባችሁ ጉዳት ያስቀየማችሁ ሰው ካደረሰባችሁ ጉዳት ይበልጣል” ። ምን ማድረግ ትችያለሽ? ቂምን ለመተው ፈቃደኛ ሁኚ እርግጥ ነው፣ የትዳር ጓደኛሽን ተጠያቂ ማድረግ ሊቀናሽ ይችላል። ይሁን እንጂ ቂም መያዝ በአንቺ ላይ የተመካ እንደሆነ አትርሺ። ራስሽን በሐቀኝነት መርምሪ እንደሚከተለው በማለት ራስሽን ጠይቂ፦ ‘ቁጣው የማይበርድለት ሰው ነኝ? በቀላሉ የምቀየም ነኝ? በጥቃቅን ነገሮች የመጨቃጨቅ ዝንባሌ አለኝ?’ በእርግጥ መነጋገር የሚጠይቁ ጉዳዮችን ለዪ ቅር በተሰኘሽበት ነገር ላይ መወያየት አስፈላጊ እንደሆነ ከተሰማሽ ደግሞ ቁጣሽ እስኪበርድ ጠብቂ። ‘ይቅር ማለት’ ምን ትርጉም እንዳለው ተረጂ ይቅር ማለት ሲባል በደሉን አቅልለሽ መመልከት ወይም ምንም እንዳልተፈጠረ መሆን ማለት አይደለም፤ ከዚህ ይልቅ ቂም መያዝ ከበደሉ የበለጠ ጤንነትሽንና ትዳርሽን እንደሚጎዳው በመገንዘብ ጉዳዩን ትተዪዋለሽ ማለት ነው። የይቅርታን ልቦና አምላክ የያድለን

ትሁት ቅን ታዛዥ ትግስተኛ ሁን አጉል ብልጣብልጥ አትሁን ነገር ግን ሞኝም አትሁን የሰው ሀቅ አትመኝ ከተረፈህ ላይ ሳይሆን ካለህ ላይ ቀንሰህ ስጥ የማትፈልገውን ሳይሆን የምትፈልገውን ስጥ ምክንያቱም የማትፈልገውን ለሰው ከሰጠህ እንደሰጠከው ሳይሆን እንደጣልክበት እወቅ ዘረኝነትን አብዘተህ ጥላ አንድቀን ያጠፋሀል እምነት ተስፋ ፍቅር ይኑርህ ስላለፈው አትጨነቅ ተማርበት እንጂ

አጣልቶ ሚያጣብቅ ፍቅር ይስጣቹ! ይህንን ሀረግ ሳስብ ሁሌም ለምን እንደተባለ እመረምራለውኝ፤ ይህንን ታሪክ ማስታውሰው ምንጩን ከማላስታውሰው ወግ ላይ ባነበብኩት ታሪክ ነው። ሽማግሌው ተጋቢዎችን ይመርቁ ሲባሉ "አጣልቶ ሚያጣብቅ ፍቅር ይስጣቹ!" አሉ፤ ለምን እንዳሉ ሲጠየቁ ትዳር አለመነካካት ወይም አለመጣላት ሳይሆን ተጣልቶ ሳይለያዩ መልሶ በፍቅርና በይቅርታ መጣበቅ ነው ያሉትን ሁሌም አስባለውኝ። ፍቅር እንደዚ ካልሆነ ፈተና አለው ብዬ አስባለውኝ። ለዚህ መነሻዬ ከዚህ ወግና ሀረግ በተጨማሪ አዳጊዋ አና ፍራንክ ያለችው ነው፤ "የሰዎችን ትክክለኛ ማንነት ምናውቀው በተጣላናቸው ጊዜ ነው" በጠብ ጊዜ ሰዎች ሠላምና ፍቅር በነበርንበት ጊዜ በይሉኝታ ምክንያት ሳይነግሩንና ሳይናገሩን የቀሩትን ነገር በሙሉ ይዘረግፉታል፤ ያኔ 2 ነገር እንረዳለን 1ኛ ስለእኛ በትክክል ምን ያስቡ እንደነበር? 2ኛ ከልብ ለእኛ ቦታ ያላቸው መሆን አለመሆኑን? እንረዳለን! በፍቅር ሕይወት ውስጥ ሚቻለው አለመጣላት አይደለም! እንደዛ ማድረግ ከባድ ነው! እንኳን ሰውና ሰው እግርና እግር እንኳን ይጋጫል እንደሚባለው አንጣላም ማለት አይቻልም! ግን የፍቅር ጉልበቱና ጥንካሬው ሚወሰነው ተጣልቶ "ጨዋታ ፈረሰ ዳቦ ተቆረሰ" ሳይሉ ልብ ላይ የሚሰካ ቁስል ሳይፈጥሩ በንግግርና በፍቅር ሠላም አውርዶ መልሶ በመጣበቁ ላይ ነውና ለሁሉም አጣልቶ ሚያጣብቅ ፍቅርን ይስጥ!

እንደ ......... እዮብ ታጋሽ እንደ.....……ዳዊት አመስጋኝ እንደ .........ሙሴ ቀና እንደ ......…ይስሃቅ ታዛዥ እንደ ........አብረሃም ደግ እንደ ..........ዮሴፍ ሰባኪ እንደ.......... ሰለሞን ጠቢብ {{ # አድርገን }} አሚን

Dr. Eyob Mamo ፍርሃትህን አስርበው! በአሁን ሰዓት የትኛውንም ሰው ምን አይነት ፍርሃት እንዳለው ብትጠይቀው አነሰም ተለቀም የሆነ የሚሰጋበት ነገር እንዳለው ይነግርሃል፡፡ ልዩነቱ ያለው የሚፈራና የማይፈራ ሰው በመኖሩና ባለመኖሩ ላይ ሳይሆን፣ አንዳንዱ ሰው ፍርሃቱን መጋቢ፣ ሌላኛው ሰው ደግሞ ፍርሃቱን አስራቢ በመሆኑ ላይ ነው፡፡ አንተስ የምትፈራው ነገር ምንድን ነው? ይህንን ጥያቄ ስታነብ፣ “አይ እኔ ምንም አይነት ፍርሃት የለብኝም” የሚል ሃሳብ ካለህ፣ የፍርሃትን ስሜት አምኖ በመቀበል የመጋፈጥ ፍርሃት እንዳለብህ ጠቋሚ ነው፡፡ ስለዚህ ይህ አይነቱ ፍርሃት የድርብ ፍርሃት ሰለባ ያደርግሃል፡፡ አንዱ መጀመሪያውኑ ያለብህ ፍርሃት ሲሆን፣ ሌላኛው ደግሞ ፍርሃቱ እንዳይታወቅብህ ያለህ ፍርሃት ነው፡፡ እሺ፣ ፍርሃትን እምኖ በመቀበልና በመጋፈጥ አስፈላጊነት ከተስማማን፣ መጻፌን ልቀጥል፣ እንተም ማንበብህን ቀጥል፡፡ ስለዚህ ወደነጥቤ ስመለስ . . . ፍርሃትህ ሁለት ገጽታ አለው፡፡ አንዱ ገጽታው ጤናማ ሲሆን ሌላኛው ገጽታው ደግሞ ጤና-ቢሱ ነው፡፡ የፍርሃት ጤናማ ገጽታው ከፍርሃቱ የተነሳ ልትወስድ የሚገባህን ጥንቃቄ በመውሰድ ሊወገድ ከሚችል እንቅፋትና ችግር የመጠበቅህ ጉዳይ ነው፡፡ ይህ ገጽታ ፍርሃቱን ካሸነፍክ በኋላ የምትገባበትን ደስ የሚል አለም ያጎላልሃል፡፡ የፍርሃት ጤና-ቢስ ገጽታው ግን ከፍርሃቱ የተነሳ ሊደርስብህ የሚችለው ሁኔታ ሲጎላብህና ውጤቱ አስከፊ ወደሆነ ምላሽ ውስጥ ሲነዳህ ነው፡፡ ይህ ገጽታ የፈራኸው ነገር ቢደርስና ብትሸነፍ የሚሆንብህን አስከፊ ሁኔታ ያጎላብሃል፡፡ ለፍርሃት ሊኖርህ የሚገባ ምላሽ ፍርሃትህን የማስራብ ምላሽ ቢሆን ተመራጭ ነው፡፡ ፍርሃትን ማስራብ ማለት ፍርሃትህን ከሚመግቡ ሃሳቦች፣ ሁኔታዎች፣ ማህበራዊ ትስስር መድረኮችና ሰዎች ራስን መጠበቅ ማለት ነው፡፡ ከዚህም በተጨማሪ ፍርሃቱ እያለም ሆነ ተወግዶ በፈጣሪህ እርዳታ ወደፊት ስትዘልቅ ልትገባበት የምትችለውን አስገራሚ የድል አለም ማሰላሰል ነው፡፡ አፍጥጠህ ስላደርክ ወይም በብርድ ልብስህ ሽፍንፍን ብለህና ተደብቀህ ስላደርክ ፍርሃትን አታሸንፈውም፡፡ ዛሬ ማታ የምትፈራውን ነገር አድበስብሰኸው ሳይሆን አስበኸውና ልታሸንፈው እንደምትችል ውስጥህን አሳምነኸው ለመተኛት ሞክር፡፡ አይዞህ ፍርሃትህን ታሸንፈዋል!

o የንግግራችን ወሳኝነት! ለፍቅረኛሞች፣ ለእጮኛሞችና በተለይም ለባልና ሚስቶች . . . የፍቅር ግንኙነትን እንዲሁም ትዳርን ከሚበጠብጡ ሁኔታዎች አንዱ የአንደበት ጉዳይ ነው፡፡ ሁኔታው በሁለት ይከፈላል፡- 1. ከአንደበት ሊወጣ የማይገባን ነገር ማውጣት፣ 2. ከአንደበት ወጥቶ ሊነገር የሚገባውን ነገር አለመናገር፡፡ አንዳንድ ሰዎች ለአጋራቸው መናገር የማይገባቸውን ስሜት ጎጂ ነገሮች እንደቀላል ከአንደበታቸው የማውጣት ልማድ አላቸው፡፡ ከዚያ በአጋራቸው ላይ የስሜት መጎዳት ሰያዩ ጭራሹኑ አጋራቸውን ለመውቀስ ይሮጣሉ፡፡ “አንተ/ቺ እንዲያው ስስ (Sensitive) ስለሆንክ/ሽ ነው እንጂ ይሄ አሁን ምን ይጎዳል” በማለት ለማለፍ ይሞክራሉ፡፡ ሆኖም አንድ ሰው ለአጋሩ በሚናገረው ነገር ያ ሰው የመጎዳቱንና ያለመጎዳቱን ስሌት ለመስራት ከመሞከር ይልቅ የራሱን አንደበት መቆጣጠር እንደሚገባውና እንደሚቀልም ማወቅ አስፈላጊ ነው፡፡ አንዳንድ ሰዎች ደግሞ ለአጋራቸው ሊነገሩ የሚገባቸውን ገንቢ ነገሮች ተሳስተው እንኳን ከአንደበታቸው አያወጧትም፡፡ “እወድሃለሁ … ቀንሽ እንዴት ነበር? … ይቅርታ … አይዞህ/ሽ በርታ/ቺ …” እና የመሳሰሉት ንግግሮች ለአጋራቸው ሁኔታውን ባገናዘበ መልኩ ካለመቋረጥ መናገር እንዳለባቸው አያውቁትም፣ ቢያውቁት መናገር አይፈልጉም፡፡ ሆኖም አንድ አንድ ሰዎች እንደሚያደርጉት፣ ሰው አጋሩን፣ “ባልወድህ/ሽ ከአንተ/ቺ ጋር እሆን ነበር?” ከማለት ይልቅ አጋርነት ተግባርንና ንግግርን የሚያጠቃልል ሂደት እንደሆነ ማስታወስ ወሳኝ ጉዳይ ነው፡፡

የህይወት ጎበዝ ሁን! + ከክፍል አንደኛ መውጣትህ፣ ሰቃይ ተማሪ መሆንህ፣ በማዕረግ መጨረስህ- በህይወትህ ስኬታማ እንድትሆን ዋስትና ይሆንሃል ማለት አይደለም። በኢኮኖሚክስ በማዕረግ ልትመረቅ ትችል ይሆናል፣ ይሁንና ከሁሉ የተሻለ ገቢ ታገኛለህ ማለት አይደለም። ጎበዝ የህግ ተማሪ ነበርክ ማለት ጎበዝ ጠበቃ ትሆናለህ ማለትም አይደለም። ይሀውልህ፤ ህይወት- ፅንሰ ሃሳብን (concept) ከመረዳት፣ ነገሮችን ከማስታወስ (Memorise)ና፣ ፈተና ላይ ከመተግበር (reproduce) በላይ አቅም ትፈልጋለች። • ትምህርት ቤቶች፣ ሰዎችን 'ለማስታወስ ችሎታቸው' ዕውቅና ሲሰጡ፤ ህይወት ግን፣ ሰዎችን 'ለተግባራቸው' ዕውቅና ትሰጣለች። + • ትምህርት ቤቶች ማስጠንቀቂያ (caution) ሲሰጡ፤ ህይወት ግን ድፍረትን ትሰጣለች። + • ትምህርት ቤቶች በ"ደንብ" የሚኖሩትን ሲያመሰግኑ፤ ህይወት ግን ደንብን ጥሰው፣ አዲስ ህግን ያስቀመጡትን ታወድሳለች። + ታዲያ ሰዎች በትምህርት ቤት ጠንክረው መማር የለባቸውም እያልኩ ነው?- በፍፁም። መማርህ የግድ ነው። ይሁንና "አንደኛ" ለመውጣት ብለህ ሌሎች ነገሮችን ሁሉ መስዋእት አታድርግ እያልኩህ ነው። + ያንተ ጉብዝና በ10ኛ ክፍል ውጤት አዘለለህ፣ በ12ኛ ክፍል ውጤት አስፈነደቀህ፣ በከፍተኛ ትምህርት ውጤትህ አስወደሰህ... + ከዛስ? - ከዛማ ቅጥረኛ ሆነሃል። የወር ደሞዝ ትጠብቃለህ፣ ፍቃድህ በአለቃህ (ሰቃይ ተማሪ ባልነበረው) ላይ ወድቋል። + ትላንት ግብረገብ ላይ ጥሩ ሆኖ በሌላ ዘርፍ ግን ደክሞ የናቅከው ተማሪ፣ ዛሬ የሞራል አለቃህ (የሃይማኖት ሰው) ሆኖ ይመራሃል፤ ትላንት ስነ-ዜጋ ላይ በርትቶ በሌላው ግን ደክሞ የተቸኸው ተማሪ፣ ዛሬ ባለስልጣን ሆኖ አጠገቡ ለመድረስ የምትናፍቀው ሰው ሆኗል፤ ትላንት ስእልና ሙዚቃ ላይ ጊዜውን እያጠፋ በሌላው ግን ስለደከመ የናቅከው ተማሪ፣ ዛሬ የምታደንቀው አርቲስት ነው፤ + ትላንት ሽቦ ሲወጥር፣ እንጨት ሲቆርጥ- ከነጓደኞችህ ያሾፍክበት ተማሪ፣ ዛሬ እርሱ ጋር ለመቀጠር በብርቱ የምትፈልገው የትልቅ ኢንዱስትሪ ባለቤት ሆኗል። + የትምህርቱ ጎበዝ በህይወት ጎበዞች ተበልጠሃል። ዛሬ ላይ ቆመህ የነርሱን ህይወት ትናፍቃለህ። ደስታህ በደስታቸው፣ ሀዘንህ በሀዘናቸው ላይ ተመሥርቷል። አሁንም ግን ጊዜው አልረፈደም። እስትንፋስህ እስካለች ህይወት ትቀጥላለች። ራስህን በክፍል አትገድበው፤ በምግባርህ ጎልተህ ውጣ፤ የመሪነቱንም ድርሻ ውሰድ። + እስቲ የንግድ ሥራ ጀምርና አይሳካልህ፣ ብዙ አማራጮችን ትቀስምበታለህ። ለምርጫ ተወዳደርና ተሸነፍ፣ የፓለቲካ ሳይንቲስት የማያስተምርህን ነገር ያስተምርሃል። ውስጥህ ያለውን ተሰጥኦ አውጣውና ይታይ፣ አጎልብተውም፤ በሙያህ ዘርፍ ብቻ ሳትገደብ መፅሐፍትን አንብብ፣ ያመንክበትን ነገርም አድርግ። በቃ! ጎበዝ ተማሪ ለመሆን ከማሰብ ይልቅ፣ ጎበዝ ሰው ለመሆን አስብ። ትምህርት ቤትህን አለምህ አታድርገው፣ አለምህን ትምህርት ቤትህ እንጂ!። + ወደፊት ተራመድ፤ ፓለቲካውን ሞክር፤ ኪነጥበቡን ሞክር፤ ግብርናውን ሞክር፤ ንግዱን ሞክር፤ በቃ ተጨማሪና አዲስ ነገር ሞክር!! ልብ በል፤ ፈጣሪም የሚረዳው የሚሞክሩትን ነው። ከሰማይ ይልቅ በምድር ያስቀመጠህም በአላማ ነው። የምትበርበት ክንፍ ያልሰጠህ አውሮፕላን ሰርተህ እንድትበር፣ ተሽከርካሪ እግር ያላደለህ መኪና ሰርተህ እንድትሽከረከር ነው። ከርሱ ዘንድ፣ በየቀኑ የሚሰጥህን ዕድል ያለመሰሰት ተጠቀምበትና የህይወት ጎበዝ ሁን!

ፍቅር "ሰው ስትሆን በህይወትህ ብዙ ነገሮችን ታገኛለህ ፣ታጣለህ ፤ብዙ መንገድ ትሄዳለህ ፣ትመጣለህ ፤ሀዘን እና ደስታ ይፈራረቁብሀል ፤ ብዙ ስቃይና መከራ ፣ብዙ ስኬት እና እረፍት በህይወትክ ከሚያጋጥሙህ ነገሮች መሀከል ናቸው፡፡ በነዚህ ውስጥ በሁሉም ቦታ ፍቅር አለ፡፡ ሲነጋም ፍቅር አለ ሲመሽም ፍቅር አለ፡፡ ፍቅር ማለት ፍቅረኛ አይደለም፣ፍቅር ሰው አይደለም ፤ፍቅር አንድ ትልቅ ሀይልን የተላበሰ የፈጣሪ ፀጋ ነው፡፡ ቀመር የለውም ፣አቅጣጫ አይቀመጥለትም፡፡ ፍቅር መከላከያም ሆነ መቆጣጠሪያ ወይም ደሞ ሀይል መጨመሪያ የለውም፡፡ ፍቅር አያዳላም ለዛም ማሳያ እኛ አፍሪካዊያን እንሆናለን፡፡ በሀብት ፣በቀለም ሳያሳንሰን ከ አውሮፓ እና አሜሪካ ጋር ያለው የፍቅር ስሜት በኛ ልብ ውስጥም እንዲያድር ሆኗልና፡፡ ደግመዋለው ፍቅር ማለት ፍቅረኛ ማለት አይደለም፡፡ ፍቅር ትምህርት ነው ፣ፍቅረኛ መምህር፡፡ ትምህርት ከመምህሩ በላይ የሆነ ተሰፍሮ ፣ተቆጥሮ ማያልቅ ከተመገቡት የሁሉንም ጭንቅላት እንደሚሞላው ሁሉ ፍቅርም ከአፍቃሪው በላይ የሆነ ለተመገቡት ሁሉ ህይወትን በሀሴት የሚሞላ ተሰፎሮ ማያልቅ እጅጉን ፍፁም አስደሳች እና ሰላም ያለው የህይወት ምግብ ነው፡፡ ሁላችንም እኩል ፍቅር ተሰጥቶናል ተቀብለን ምናስቀምጥበት ቦታ ይለያያል እንጂ . . .

(ማስታወሻ፦ ጾታው በወንድም፣ በሴትም ሆኖ ይነበብ) በሕይወትህ ልትወስናቸው ከምትችላቸው ታላላቅ ውሳኔዎች መካከል የትዳር ጓደኛህን የመምረጥ ውሳኔ አንዱ ነው፡፡ የትዳርን ምርጫ ግዙፍ ነው የምንልበት ምክንያት ተጽእኖው ከትውልድ ወደ ትውልድ የመዝለቁ ጉዳይ ሲሆን፣ በተጨማሪም ማንኛውም ሕብረተሰብ የሚመሰረተው ፈጣሪ ባስቀመጠው በዚህ ምሰሶ ላይ በመሆኑ ነው፡፡ አንዳንድ ሰዎች ይህንን የሚያክል ግዙፍ የውሳኔ መስክ ውስጥ ፈጥነውና በሚገባ ሳያስቡበት ይገባሉ፡፡ የዚህ ጥበብ የለሽ እርምጃ ሰበብ ጠልቆ የሚቆርጥ ጉዳይ ነው፡፡ አንድ ሰው የማይዘልቅ ትዳር ውስጥ ሲገባ ራሱን ከመጉዳት አልፎ፣ የትዳር ጓደኛውንና ልጆችን፣ አልፎም የልጅ ልጆችን ቀውስ ውስጥ ሊጨምር ለሚችል ነገር ራሱን ይጋብዛል፡፡ እንደ እምነትህ፣ እንደ ባህልህና እንደ ግንዛቤህ የትዳር ጓደኛን የመምረጥ መብትህ እንደተጠበቀ ሆኖ፣ ልትዘነጋቸው የማይገቡህ መሰረታዊ ሃሳቦች ግን ሊሰመርባቸው ይገባል፡፡ አንዳንድ መነሻ ሃሳቦችን ለመንደርደሪያ ለመጥቀስ ያህል የሚከተሉትን ላስታውስህ፡፡ 1. መማረክንና ፍቅርን አታምታታ “ውበት” ግላዊ እይታ መሆኑ እንደተጠበቀ ሆኖ፣ ውጫዊ ውበትን እንደ ብቸኛ መስፈርት አስቀምጠህ በዚያ ስለተማረክ ብቻ ወደ ትዳር የሚወስድ ፍቅር እንደያዘህ ከገመትክ ጎዶሎ ግንዛቤ ውስጥ እንዳትገባ ጥንቃቄ ያስፈልጋል፡፡ የገጽታ ውበትን አስፈላጊነት ሳንክድ፣ እርሱ ለብቻው እንደመስፈርት ሲቀመጥ ግን ብዙ ጉድለቶች አሉት፡፡ በገጽታ ስከተማረክ ብቻ በአመለካከት ፈጽሞ ከማትመጣጠነው ሰው ጋር እስከወዲያኛው የመኖርን ምርጫ በሚገባ ልታስብበት ይገባል፡፡ 2. አድናቆትንና ፍቅርን አታምታታ አንድ እጅግ ዝነኛ የሆነን ሰው ስንቶች ሊያዩት፣ ሊሰሙትና ሊዳስሱት እንደሚፈልጉ አስበኸው ታውቃለህ ብዬ እገምታለሁ፡፡ ለአንድ ሰው ያለን የአድንቆት ስሜት ፍቅር ሊሰጠን ለሚችለው ስሜት ጋር የመቀራረብ ባህሪይ አለው፡፡ ያደነቁትን ሰው አግብተው በደስተኛነት የቀጠሉ ሰዎች መኖራቸው እንደተጠበቀ ሆኖ፣ ሁኔታው ሊሰጠን ከሚችለው ፍቅር መሰል ስሜት የመጠበቅን ጉዳይ ግን ሊታሰብበት ይገባዋል፡፡ 3. አጋርንና ፍቅረኛን አታምታታ በብቸኝነት ስሜት ውስጥ ሆነን ያለንበት ሁኔታ የማንወጣው ሲመስለን ለመጀመሪያ ጊዜ ከቀረበን፣ ከደገፈንና ያንን ስሜት ካስታገሰልን ሰው ጋር የመጣበቅ ዝንባሌ አለን፡፡ ይህንን የተሰፋ ስሜት ከፍቅር ስሜት ጋር ማምታታት በኋላ ወደምንጸጸትበት ውሳኔ ውስጥ ሊጨምረን ይችላል፡፡ በዚህ ሁኔታ ተቀራርበው ወደዘለቀ ጋብቻ የሄዱ ሰዎች መኖራቸውን ባንክድም፣ ከብቸኝነትም ሆነ ከሌሎች ችግሮች የሚያወጡን ሰዎች ለጊዜው አጋሮቻችን ናቸው ማለት ዘላቂ ፍቅር አለን ለማለት ያስቸግራል፡፡ 4. ወሲባዊ እርካታንና ፍቅርን አታምታታ ባላቸው የወሲብ ሕይወት ልቅ የሆኑ ሰዎችን ብትጠይቃቸው ከተለያዩ ሰዎች ጋር የነበራቸው ወሲባዊ ግንኙነት “አርኪ” እንደነበር ሊነግሩህ ይችላሉ፡፡ “ከእርካታው” በኋላ ግን ሌላ “እርካታ” ፍለጋ ወደሌላ ሰው አልፈው ሲሄዱ ራሳቸውን ያገኙታል፡፡ ወሲብ (Sex) ለብቻው የፍቅር መግለጫ እንዳልሆነና የትዳር አጋርን ስንመርጥ ሌሎች ትክክለኛ መስፈርቶችን መጠቀም እንዳለብን ማሰብ ጠቃሚ ነው፡፡ 5. መስመሩን የጠበቀ አመጣጥ መሆኑን አረጋግጥ በፍቅር ጎዳና ውስጥ አንድ ሰው ወደ አንተ የመጣበት አመጣጡ ከአንተ ጋር የመቆየቱንና ያለመቆየቱን ሁኔታ ይወስናል፡፡ ከዚህ በታች ያሉት መስፈርቶች አንተ ባሉህ ጤናማ መስፈርቶች ላይ ተጨማሪ መዋጮ ያደርጉልሃል፡፡ ☞ የመቀባበልን ሕግ ተገንዝቦ የመጣ ከፍቅረኛህ ጋር ያለህ ግንኙነት እውነተኛና ዘላቂ የመሆኑ ምልክት አንዱ ከጋብቻ በፊት ሁሉን ነገር በግልጽ የመተዋወቃችሁ ጉዳይ ነው፡፡ ዛሬ ግንኙነቱ ላለማጣት የተደበቀ ነገር የኋላ ኋላ መገለጡና መዘዝ ይዞ ብቅ ማለቱ አይቀርም፡፡ ትክክለኛ ፍቅር ሁሉን አውቆ ከነጉድለት መቀባበልን ያቀፈ ነው፡፡ ☞ ያለህን ሳይሆን አንተን ፈልጎ የመጣ እኛን ሳይሆን ያለንን ነገር ተከትሎ ከመጣ ሰው ጋር ዘላቂነት ያለውና ጥራት ያለው አብሮነት የመኖራችን ሁኔታ አጠራጣሪ ነው፡፡ በአንድ ጎኑ ዛሬ ያለኝ ነገር ነገ ሊጠፋ ይችላል፡፡ በሌላ ጎኑ ደግሞ ያለውን ሰው እየፈለገ የሚከታተል ሰው ነገ የተሻለ ሲያገኝ መሄዱ አይቀርም፡፡ ☞ “ትቶ” የመጣ ከቤተሰቦቹም ሆነ ከቀድሞ ጓደኞቹ ጋር ያለውን ግንኙነት ከፍቅር ሕይወቱ ጋር በሚዛናዊነት ለመያዝ ያልተዘጋጀ ሰው ለችግር በርን የሚከፍት ሰው ነው፡፡ አንዳንድ ሰዎች ወደ ትዳር ከገቡ በኋላ እንኳ ከቀድሞ ጓደኞቻቸው ጋር፣ አንዳንዴም ከቀድሞ ፍቅረኞቻቸው ጋር (ወንድምና እህት ነን በሚል ሰበብ) የነበራቸውን ግንኙነት እንደነበረ መቀጠል ይፈልጋሉ፡፡ ከጋብቻ በኋላ፣ ቀድሞ የነበሩ ግንኙነቶች (ቤተሰብን ጨምሮ) ትዳርን በማይነካ መልኩና በጋራ ውይይት ሊያዙ ይገባቸዋል፡፡ ☞ “ለድግግፎሽ” የመጣ ለመቀየር የምትችላቸው ባህሪያቶችህን የሚሞግትና እንድታስተካክል የሚደግፍህ፣ ሊለወጡ የማይችሉ የማንነትህን ዘርፎች ግን የሚቀበል ሰው ለዘላቂ ግንኙነት መሰረት ነው፡፡ ራሱን ለማየትና መስተካከል ያለበትን ለማስተካከል ዝግጁ ያልሆነ፣ በተቃራኒ ግን ሁል ጊዜ መለወጥ ያለብህ አንተ እንደሆንክ የሚያስብ ሰው በጥንቃቄ ሊታይ ይገባዋል፡፡ ትክክለኛና ዘላቂ ግንኙነት በግል ከመቆም (Independent) ወይም በአንድ ሰው ላይ ብቻ ተደግፎ ከመቆም (Dependent) ይልቅ በጋራ ተደጋግፎ ወደመቆም (Interdependent) ዘልቆ የሄደ ነው፡፡