መጽሐፍ ቤት Bookstores

ያደረግኩትን ካደረግኩ በኃላ ፈገግ አለች....በስነስርአቴ የተደሰተች መስሎኝ ደስ አለኝ....አብሬያት አገጠጥኩ.... "ለምንድን ነው የሳቅከው..."....ስትለኝ የምመልስላት አጣሁ..."ስትስቂ ነው የሳቅኩት... "..ይባላል....? "እኔንጃ.... ስለሳቅሽ መሰለኝ....".....ሳቋን ደገመችው...አሁን ነው ያስተዋልኳት...ሳቋ ላይ ፌዝ አለ.... "ምን ያስቃል....?" "ቅድም ነበር ይሄን መጠየቅ የነበረብህ...." "አሁን ጠየቅኩሻ...."....ስናደድ በማወጣው ድምፅ ነው ይሄን ያልኳት... "ይልቅ ስለ ቅድሙ ሳቄ ልንገርህ...."....አለችኝ ረጋ ብላ...ለመስማት ተመቻቸሁ.... "ቅድም ምንድን ነው ያደረግከው..." "ምን አደረግኩ....?....."....ከልቤ አላደረግኩትም መሰለኝ ከመቅፅበት ረሳሁት... "የወደቀውን እንጀራ አነሳኸው...ከዛ ሳምከው...ከዛ ጣልከው..." "እና ምን ያስቃል...ሲደረግ አይተሽ አታውቂም...እንጀራ ሲረገጥ ግፍ እንደሆነ አታውቂም...."....ከዚህ ንግግሬ በኃላ ሳቋ አላባራ አለ...... "አልመለስሽልኝም ምን ያስቃል...."....ጮህኩባት.... "የሹፈት ሳቁን ምን አመጣው...."...ሳቋን አልገታ ስትለኝ ጥያቄ ደገምኩ... "ልትጥለው ለምን ሳምከው...."...መልሳ ጠየቀችኝ.... "እንዳይረገጥ...."...መለስኩ "ግፍ ፈርተህ ማለት ነው...."....አዎ አልኳት በአንገቴ ንቅናቄ....ዝም ብዬ ሳያት እስቲ ዝም ብዬ ልከራከረው..ላናደው....ልቃረነው ብላ እኔ ጋር የምትመጣ ይመስለኛል....ብዙ ጊዜ አይቻታለሁ ግን ልትገባኝ አልቻለችም.... "ለማንኛውም ተረጋጋ...ይሄ ነገር ስለማይገባኝ ነው...መልሰህ ለምትጥለው መሳሙን ምን አመጣው...ላትበላው ነገር አቧራውን ማራገፉ ምንድን ነው...ከመሬት ላታላቅቀው ጥግ ማስያዙ ምን ይፈይዳል...እንጀራው ነብስ ቢኖረው ስታነሳው የሚሰንቀው ተስፋ ...ካፍህ ስታስጠጋው ደግሞ አስበው...ቤቱ ጠፍቶበት መንገድ የወደቀን ህፃን አንተ ቤቱን እያወቅከው አንስተህ ልብስ ገዝተህ መልሰህ ጥግ አስይዘህ እንደመጣል ነው..." በተራዬ ከት ብዬ ሳቅኩ....."ለምን ትስቃለህ...ምን ያስቅሀል...?"...ብላ እንድትጠይቀኝ ጠበቅኩ...እሷ እኔን ትታ አየር አየሩን ታያለች.... "ምን ያስቅሀል አይባልም...?" "ምን እንደሚያስቅህ እያወቅኩ ምን አሰጠየቀኝ...." "እሺ አትናደጂም...?" "ካንተ ከዚህ የተሻለ አረዳድ ስለማልጠብቅ አልናደድም...."..... "ምን ማለት ነው...."....በገንኩ.... "ኡፍ አቤል ሳትጠይቅ ለመረዳት ሞክር...አንዴም ተረድተኃኝ ስለማታውቅ እንድትረዳኝ አልጠብቅም...ባልጠበቅከው ነገር ደግሞ አትናደድም...." ዝምታ መሀላችን ተመቻችቶ ተቀመጠ.....ቡናችን ከእጣን ጢስ  ጋር መጣ....አስተሳሰቧ ያስደነግጠኛል....ስታስተውል ጉድ ታስብላለች...ቡናዬን ሳማስል ሳይቀር እየተጠነቀቅኩ ነው...ደግሞ ምን ትላለች እያልኩ...ብዙ አትከራከረኝም...የዛሬ ሁለት አመት የነበረው ጭቅጭቃችን በርዷል....ተስማምተን ወይም አንድ ሆነን አይደለም...ሁሉ ነገሬን አስተውላ ደክሟት ነው.....አንዳንዴ እንትጨቀጭቀኝ እና ለምን እንትለኝ እያወቅኩ አጠፋለሁ...የእርሷ መልስ ዝምታ ወይንም የሹፈት ሳቅ ነው.... "ታውቃለህ አቤላ አሁን አንስተህ ስለጣልከው እንጀራ ስናወራ የሆነ ቁም ነገር ታስተውላለህ ብዬ ነበር...ማለት አንድ አንዴ እንኳን ታስባለህ ብዬ አስብ ነበር...." "ምን ማለት ነው አንዳንዴ ታስባለህ ማለት..."....ድምፄ ላይ ንዴት አለ.... "ኡፍ አቤል ኡፍ...."....ከተቀመጠችበት ተነሳች....ተከትያት ስነሳ ላየኝ ሰው በእሷ መቀመጫ የምጠቀም ነው የምመስለው... "ምን እየሆንሽ ነው...." "እየሄድኩ...." "መሄድን ምን አመጣው...." "ፍራቻ...እና ስልቸታ...." "ምን እንደሰለቸሽ አውቃለሁ....ግን የምን ፍርሀት ነው....." "ስመህ እንደጣልከው እንጀራ ትጥለኛለህ የሚል ፍራቻ...." "ኧረ ሄሉ ተረጋጊ...ብለን ብለን በእንጀራ እንጣላ...ከዚህ በኃላ የምን ማንሳት የምን መሳም አሽቀንጥሬ ነው የምጥለው....ቁጭ በይ እናውራ...." "መቼም አይገባህም...ደነዝ ነህ አንተ....".....ብላኝ ፈረጠጠች.... ከገባችሁ አስረዱኝ...እኔ ምንም አልገባኝም...🤷‍♂ ✍Shewit

🌼እንኳን አደረሳችሁ! መልካም አዲስ አመት

በውሽንፍር ውስጥ ነበር ያየኃት...የሆነ ሰቅጣጭ አየር...እየጣደፈች ስትሄድ ነበር...ያለ ጥላ...እኔ እያነከስኩኝ ነበር...ከደረሰብኝ የመኪና አደጋ ላመል ማገገሜ ነበር...ትዝ ይለኛል ተጨማሪ እረፍት ልጠይቅ ወደ መስሪያ ቤት እየሄድኩ ነበር...የመኪናዎቹን ፍጥነት ያላገገመ እግሬ የሚቋቋም አልመሰለኝም...የዜብራ መንገድ ጫፍ ላይ ቆሜ በመኪናዎቹ እየተበሳጨሁ ነበር ያየኃት....'ምን አይነቶቹ ህሊና ቢሶች ናቸው...ዜብራ ላይ መቆሜን እንዴት አያስቡም' እያልኩ በውስጤ ሳጉተመትም ነበር አጠገቤ የቆመችው....'እነዚህ እኮ ካልገቡባቸው አያቆሙም' ብላ አየችኝ....'መፍጠን ስለማልችል ነው የቆምኩት...'...አልኳት ወደ እግሬ እያየሁ....እጄን ያዘችኝ....ከዛ እርምጃዋን በእኔ ልክ ገታች...'እየተጣደፈች አልነበር አሁን ምን ጎተታት' ስል ልቤን ሞገትኩ.... 'እንጃ' አለኝ ልቤ....'ውሽንፍር አይደል እንዴት አብራኝ ልትበሰብስ ወደደች....'....ጥያቄ ደገምኩ....'እንጃ'....መለሰ ልቤ.... በመጨረሻም ዜብራ መንገድ ላይ አይተው እንዳላየ ያለፉኝን ሹፌሮች አመሰገንኩ..ያጣደፋቸውን ጉዳይ መረቅኩ...ሌላው ሳይቀር የገጨኝን መኪና ወሮታ መክፈል ቃጣኝ....አንዳንዴም ወለምታ ቆንጆ ነው ለካ.....እንኳን አመመኝ.... ✍Shewit

ኤደን ደማቅ ጥቁር ነች ። የጥርሷ እና የአይኗ ንጣት ጥቁረቷን ያጎለዋል ። ልበ ደንዳና የምትባል አይነት ነች ። አወራሯ ፣ አደናነቋ ፣ አገራረሞ የእናት ነው። ተንከባካቢ  ነች ።አባቷ ስድስት ኪሎ university ያስተምራል ፤ ምስጉን የታሪክ ፕሮፌሰር ነው ። መጀመርያ አካባቢ ሁኔታዬን እያየች የግርምት ፈገግታ የፈገገች ይመስለኝ ነበር ( አሁን ፈርዶብኝ እንጂ ፈገግታን መመርመር ነበረብኝ? ) ኤደንን አወቅኳት ፤ ሳውቃት አመንኳት ፤ እሷ ጋ ነፃ ሆንኩ  ።  ድሮ እናቴ ጋ ስሆን የሚሰማኝ 'security' ይሰማኛል። ኤዱ ጥያቄ መጠየቅ ትወዳለች ። ስለራሴ ተጠይቄ የማላውቀውን ፣ አስቤው የማላውቀውን ፣ ደጋግሜ ያሰብኩትን ነገር በፍቅር ትጠይቀኛለች ለራሴ እንደማወራ ሆኜ ሳልጠነቀቅ ፣ ሳልሰጋ አጫውታታለሁ ።  ትሰማኛለች አሰማሟ ርህራዬ አለው ። ሳወራ በትኩረት እንደ ተከታታይ ፊልም አይኗን ፣ ጆሮዋን ሰጥታ ትከታተለኛለች ። ከራሴ ጋ እተዋወቅ ጀመር ። ገጠመኝ ያልኩትን 'incident' ጠቅላላ ስቶሪ አደረገችልኝ ። ሳወራት ቀለል ይለኛል ። "መንገደኛው ሁሉ ይወቅኝ አልልም ። ልቤ ውስጥ ያለውን እውነት በእኔ ልክ ሁሉም ጋ ይስረፅ አልልም ። እንከን አልባ ለመሆን አልሞክርም"ያለቺኝ ቀን ያለቺው እውነት እንደነበር ኑሮዋን ሳጤነው ደረስኩበት ታድላ አልኩ ! ሁኔታዋ ከሰዎች ጋ ያላት መቀራረብ ሰላማዊ ነው ። ራሷን በየቦታው አታስረዳም ። ስለ'ኔ ሳወራ እኔም እኔም እያለች እንደ'ኔ ጨዋታ አታደፈርስም ።   የሆነ ሰው ቱግ ሲል ፣ በተገቢው  "treat" ካላደረጋት  በእርጋታ ታስረዳለች ፤ አልያ ታልፈዋለች አባቴ "ሰነፍ  ነው ለአፀፋ የሚቸኩለው ይላል" ትላለች ። የሆነ ቀን እያወራን "ከሁሉም ነገር ጋ ራስን ማገናኘት ፤ በሁሉም ቦታ ራስን ለማስከበር መሞከር ፤ ሁሉም ሰው ቀልቡን ይስጠኝ  አይባልም" አለችኝ። አባባሏ እንደምክር አይደለም  ቀለል አድርጋ ነው።  በጊዜው ያስፈልገኝ ነበር ፤ የወረወረቺው ሃሳብ ሳልከራከር ፣ ሳላብራራ ዋጥኩት ራሴን  በእርጋታ እንዳጤነው ፍርሃት እና ስጋቴን እንዳየው አደረገችኝ   ። ትላፋኛለች ፣ ትስመኛለች ፣ ታደምጠኛለች ። ቅሬታዬን ስነግራት "ትክክል ነው ግን እስቲ እንደዚህስ ሊሆን አይችልም?" ትላለች ። ከብዙ አቅጣጫ ሁኔታውን ታሳየኛለች ። ስናደድ ፣ ሲደብረኝ በጥሞና ሁኔታዬን ማኔጅ ማድረግ አለመደችኝ ። ቅር ያለኝን ነገር ተረጋግቼ እንድናገር ፤ ምንም አይነት  ኮተት ሃሳብ አልጋ ላይ ይዤ እንዳልሄድ  ሁሉንም ነገር በ "serious" እንዳልወስደው በኑሮዋ አስተማረችኝ Don Miguel Ruiz የፃፈውን  The Four Agreements"  Mark Manson የፃፈውን  The Subtle Art of Not Giving a F*ck"   Eric Ries የፃፈውን "The Lean Startup" የአቡነ ሺኖዳን   የነፍስ አርነት  Daniel Goleman የፃፈውን  "Emotional Intelligence"  ብዙ መፅሃፎችን በቁምነገር እየተከታተለች አስነቡችኝ እሷ ኑሮዋ ፣ ፍቅሯ ያስነበበችኝ መፅሃፎች አዳኑኝ ! ጎበዝ አስተማሪ ነበረች ፣ ጎበዝ ተማሪ ነበርኩ እና ዳንኩ !    መፈለግ እና መትጋት የማያበጀው ነገር የለም !!             © Adhanom Mitiku

ክንፍ ነበረኝ✨✨ በነጋታው ባስለመደኝ ሰአት መጣ....የተለመዱትን ነገራት አደረገልኝ...ዛሬ አልበላም ብዬ ብል እንኳን ሆዴ አፍ አውጥቶ መራቤን ይነግርብኛል...አይሆንም አልኩ ለራሴ...በዚህ መልኩ መሞት ጊዜ ይወስዳል አልኩ መልሼ.... ጥርግ አድርጌ በላሁ.....ድሮ ድሮ ከእንቁላል ውጪ መስራት የሚችለው ነገር አልነበረም...ይሄን ሙያ ከየት እንዳመጣው ባላውቅም በያይነቱ ያበስልልኛል..... 'ለእኔ ብሎ አጭር ኮርስ ወስዶ ይሆናል' እለዋለሁ 'አሁን ጠልቶሻል' ለሚለኝ ጎኔ... እርሱም አይረታም...'እና እንደዛ እያልሽ ነው ራስሽን የምታፅናኚው'...ይለኛል...አንዳንዴ ጎኔን ማድመጥ ትቼ ለእኔ እየሆነ ያለውን ነገር እቆጥራለሁ.... ይመጣል...ማታ ካስቀመጠኝ ቦታ ያነሳኝና ዊልቸሬ ላይ ይሰይመኛል...መፀዳጃ ቤት ይወስደኛል...ምግብ ያበስልልኛል...ያጎርሰኛል...በየመሀሉ ይሰድበኛል...ይወጣል...ወደ ማታ ተመልሶ ይመጣል...የቅድሙን ደግሞት አልጋ ላይ ወርውሮኝ ይወጣል...ማን እንዲህ ያደርጋል...?.... እቅፉን የማገኘው ወንበር በሚያቀያይርልኝ ቅፅበት ነው...ያኔ ነው ፊቱን በቅርበት የማየው.....ለምን ሰራተኛ እንደማይቀጥርልኝ እንጃ.... ዛሬ እንደወትሮው ስራውን ከጨረሰ በኃላ ትቶኝ አልወጣም...ፊት ለፊቴ ተቀመጠ...ግራ ገባኝ..."ምነው"...ጠየቅኩ....ምንም ሳይለኝ ግራ እጄን ያዘኝ....ልክ ድሮ ቀለበት ሊያረግልኝ ሲል እንደያዘኝ መያዝ...አንደ ድሮዋ ልዕልት ተሽኮረመምኩ....የእጁን ልስላሴ ባላጣጥመውም...እጄ ቢደነዝዝም በአይኔ ብቻ ብዙ ብዙ አልኩ..."መኖር ያን ያሀል አይከብድም "..."ይወደኛል እኮ..."..."አባት ተመለሰ...."....ልቤ የድሮው ቦታው ሊሾመው ቸኮለ...አሁን ጠፍቶ የተመለሰን ሎሌ ወዲያው ጓዳ ለማስገባት መጣደፍ ምን ይሉታል...ተጣደፍኩ...መመለሱን ሳላውቅ ተጣደፍኩ። እጄን ከዊልቸሩ መደገፊያ አንስቶ ወደራሱ አስጠጋው...እስከዚህ ምንም አልተነፈሰም...ያወለቀው ቀለበት እጁ ላይ አለ...የጋብቻ ቀለበታችን...ኪሱን ሲደባብስ ጥድፊያዬ ጣሪያ ነካ...ገላዬን ሲያጥበኝ በግዴለሽነት የጣለብኝን ቀለበት ሊተካልኝም መሰለኝ...ከረጅም ጊዜ በኃላ ፈገግ አልኩ...አሁንም ጥድፊያው አለቀቀኝም...ባለፈው እንኳን ነገርኩት...መናገሬና እንባዬ እንደሚመልሰው ባውቅ ያኔ ድሮ አደርገው አልነበር እንዴ...ተጣደፍኩ...እጄ ቢሰራልኝ እኔ ራሴ ከኪሱ አውጥቼ እንደማጠልቀው እርግጠኛ ነበርኩ... ከኪሱ እስኪሪፕቶ አወጣ...ከዛ ከቦርሳው ወረቀት መዘዘ...በእስኪርፕቶው አውራ ጣቴን አቀለመ...ያቀለመው ጣቴን ከወረቀቱ ጠርዝ ካለው ክፍት ቦታ ለተመ...አሁን ቀዘቀዝኩ። "የፍቺ ወረቀት ነው...እንደምትስማሚ እርግጠኛ ነኝ...ባለሽበት ሁኔታ ምክንያት ፍርድ ቤቱ በአካል አለመገኘትሽን...."...ብዙ አብራራ... "ሰራተኛ ቀጥሬልሻለሁ...ጨርሰናል....አመሰግናለሁ...."....አለና ንግግሩን ቋጨ። በተራዬ ተለጎምኩ...አይኔ ደረቀ...አካላቴን አደጋው ባበደነው ልክ እሱም ልቤን አበደነው...ዝምምምም ጭጭጭጭጭ.......ረጭጭጭጭ ...ጩሂ ጩሂ አለኝ...ግን አልጮህኩም...ማልቀስ ፈለግኩ ግን ለእሱም ደከመኝ...ጥያቄም አለኝ ግን ከምን እንደምጀምር አላውቅም... እኔን ትቶ የሄደላት ሴት ህይወት ፊቷን ያዞረችባት እንደው እርሱም እንደሚያዞርባት ታውቅ ይሆን...."እኔን ሳያውቅ ያደረገው ነገር ነው..."...ብላ ችላ ትለው ይሆን...ምን እንዳፈራረሰ ታውቅ ይሆን...በቁም ቀብሮ እንደመጣ ታውቅ ይሆን....? "የሚያስፈልግሽ ነገር ሲኖር ለሰራተኛሽ ንገሪያት ታሳውቀኛለች....ደህና ሁኚ"...ስንብት መሆኑ ነው። "ለእኔም ቀን አለ..."....ደህና ሁን ልለው አልችልም.... ✍Shewit dorka

"ይበርዳል"....እንዳልኩት ጃኬቱን ትከሻዬ ላይ አኖረው....ሳላስበው የሆነ አይነት አስተያየት አየሁት መሰለኝ "ምነው"....አለኝ በትኩረት እያየኝ.... "ያንተ ጃኬት የሚሽረው አይነት ብርድ አይደለም የሚበርደኝ...."....አሁን ደግሞ በትኩረት ከማየቱ ላይ ግራ መጋባት አከለበት... "ያን ያሀል ወፍራም አይደለም...ወይ ከውስጥ ሸሚዜን ደርቢ..."...አለኝ ቡናማ ሸሚዙን እንደማውለቅ እያለ.... "አይደለም...አይደለም...እያልኩ ያለሁት ጭራሽ አልገባህም..."...አልኩት እንዴት እንደማስረዳው ለራሴም ሳይገባኝ "አሁን ገባኝ...የምን ዙሪያ ጥምጥም ነው...መታቀፍ ፈለግኩ አትይም...ጦጣ..."....አለኝና ከሰፊው ደረቱ ለጠፈኝ.... እቅፉን መንጭቄ ወጥቼ የእርሱ ትንፋሽ እና የእርሱ ጨርቅ እንደማያሞቀኝ ልነግረው ቃጣኝ... "ምነው ቀበጥሽ"....ይሉኛል ጓደኞቼ ገና እርሱን መውደድ ልቤ አሻፈረኝ እንዳለኝ ለማውራት ዳር ዳር ስል...ምን ላድርግ...እኔም ልቤን ምነው ቀበጥክ ልበለው....?ብለውስ ልብ ከራሱ ውጪ ማንን ይሰማና ነው .... the heart want what it wants....ተብሎ የተዘፈነለት እኮ ያለ ነገር አይደለም....ምናል አሁን ይቺ ልጅ የምታስጠልለኝ ማረፊያዬ ናት ብሎ እንኳን ትንሽ ቢራራልኝ... አሁንም እየበረደኝ ነው...እየበረደኝ ነው...ዮናስ እቅፍ ውስጥ ሆኜ የቢኒ ድምፅ እየራበኝ ነው... ልቤ ወደ ቢኒ ይጎትተኛል...ልቤ የእኔ እንዳልሆነ ነገር ከቢኒ ጋር ያዳብለኛል.. በለሊት ሳይቀር ይቀሰቅሰኛል...አንዳንዴ መተንፈስ እራሱ ዳገት ይሆንብኛል.... አሁንም ከእቅፉ መውጣት ያምረኛል...ግን አልወጣም....እሱ እቅፍ ውስጥ ቢኒን እየሳልኩ አንገቱን እስመዋለሁ...በምላሹ ጥብቅቅቅ አድርጎ ያቅፈኛል...እርሱ መች ገባው በምናቤ ከማን ጋር እየተሟሟቅኩ እንዳለሁ... አሁን እቅፉ ውስጥ ሰርጌ ነው....አዎ እየተዳርኩ ነው...ቢኒን እያገባሁት....ከዛ ጫጉላዬ ይከተላል...በምናቤ ዛሬም ሰርጌ ነው...ነገም ሰርጌ ነው...የሙሽራ ቀሚሴን አድርጌ ብቅ ስል ልክ ፊልም ላይ እንደማያቸው ወንዶች የሚያለቅስ ይመስለኛል...ደግሞ በሆነኛው ቀን የማርገዜን ዜና ሳበስረው የደስታ እንባውን ይደግመዋል....በውኔ ስላስለቀሰኝ ነው መሰለኝ በምናቤ እንባ አስገብረዋለሁ....በምናቤ ሁሌ ከበሮ ይደለቃል....ክራሩ ይከረከራል...በገናው ይደረደራል....ነጋሪቱ ይጎሰማል.....ቢኒ በጋሪው ላይ ጉብ ብሎ ሊወስደኝ  ሲመጣ ዮናስ ደግሞ ፈረሱን ይመስለኛል... "ያለ ፈረስ ጋሪ 'ጋሪ' አይባል ...ወደፊት እየገሰገስሽ ያለሽው እኮ በሚያሻሽሽ ቢኒ ሳይሆን ተሸክሞሽ በሚሮጠው ዮናስ ነው"....ይለኛል ህሊና የሚባለው ምቀኛ... "እያሻሸኝ ዘመኔ ይለቅ...ባለሁበት ልቅር...እርሱ ካለ መሮጥ ይቅርብኝ...ወዴትም አልሂድ..."....እለዋለሁ "ታዲያ እንደሱ ከሆነ ፈረሱን ሸኝዋ...." "ምን ብዬ ልሸኘው...ታኝኮ  ታኝኮ የተተፋ ማስቲካ...ጣፋጩ ያለቀን ሸንኮራ አንስቶ ነፍስ የዘራባትን ሰው...ምን ብዬ...ምን ጎደለኝ ብዬ...በሰርጓ እለት ሙሽራዋ ለቀረባት ሴት ...ለተዋረደች ሴት ክብር የሆነን ባል ምን ብዬ ልሸኘው....'ክብር አይወድልኝም ልበለው....ምን ልበለው...." "ፈረስ ያደርሳል እንጂ አይዋጋም ...ልበለው...እንኳን ሊወጋኝ ቀርቶ በሙሉ አይኑ እንኳን አያየኝም እኮ..."....ከህሊናዬ ጋር ሙግት ይዣለሁ.... ከሙግቱ በኃላ ይቺን አልኩ..... "ዮኒ...." "ወዬ እማ...." "እባክህ ከምናቤ ጋር ተወኝ...." "አልተውሽም....ምናብሽ ከእኔ ይነጥቅሻል...እማ አንቺን ይወስድብኛል....ምናብ እኮ ምናብ ነው....አንድ ቀን ትመለሻለሽ....ስትመለሺ እንድታጪኝ አልፈልግም....የትም አልሄድም.... በዛ ሰውዬ ስም ስትጠሪኝ በፈገግታ ወዬ የምልሽ አንድ ቀን ስሙን ከአፍሽ ነጥለሽ የእኔን ትሰይሚያለሽ በሚል ተስፋ ነው....ቀሽም ተስፋ ሊሆን ይችላል....ግን ተይኝ ልቀሽም....ካንቺ ጎን እስካለሁ ድረስ...ዞር ስል አንቺን እስካየሁ ድረስ ሌላው ትርፍ ነው....በቃ ፍቀጅልኝ አንቺ እስክትመለሺ ልጠብቅ... " "እቀፈኝ....".....አልኩት ከሚወርደው እንባዬ ጋር እየታገልኩ..... "እሺ...እሺ...".....ታቅፌ እንደማላውቅ አቀፈኝ....... "አልሂድ....አትሸኚኝ....ትንሽ ሞክሪ....እማ ምናብሽን ፊት ለመንሳት....አንዴ እንኳን እኔን ለማየት....."....ይለኛል እቅፉ ውስጥ ደብቆኝ.... "እሺ...እሺ...ትንሽ አይደለም በደንብ እሞክራለሁ....." ✍Shewit dorka

Partner's Content: #Mesirat 💲ቢዝነስዎን ስኬታማ ለማድረግ እንደግፍዎታለን 🤝 በ https://forms.gle/aG8JwtHPGwh8CaWn8 ተመዝግበው የመስራት ስራ ፈጠራ ፕሮግራም የሚሰጣቸውን ድጋፎች ይወቁ። ነሃሴ 20, 2016 ዓ.ም ከቀኑ 9:00 - 10:00 ሰዓት ቀድመው ይመዝገቡ ቦታዎን ያሲዙ

ከእንቅልፌ ስነቃ ደሞ ነጋ ብዬ አውቃለሁ ። አስር ብር ወድቆብኝ የማንሳት አቅም አጥቼ ከዛፍ እንደወደቀች ቅጠል ቸል ብያት አውቃለሁ ።    አይኔን እያዩ ሲያሳንሱኝ ሳይደብረኝም ደስ ሳይለኝም ቀርቶ  ያውቃል ..... እየተሰደቡ ስሜት አልባ ፊት ማሳየት እንዴት ተቻለኝ...  አልኩኝ የሆነ ቀነ እንደዋዛ ኑሮዬ ላይ ገባች .... አለባበሷን በደንብ ስመለከት ውበቷ ሲታየኝ ባወራችው ጎረምሳ ስቀና እሷን ለማግኘት ቶሎ ቶሎ የሚያድገውን ፂሜን ስቆረጥ ለሁለት ብር ከረዳት ጋ ስጨቃጨቅ ... ያላመነቺኝ ሲመስለኝ ስምል ...አልገባኝም ደግመሽ አብራሪልኝ ስላት "ዛሬም አታገኘኝም እንዴ ?"  ስትለኝ ቀጠሮ ስሰርዝ ...ፖለቲካው ኢኮኖሚው ተጭኖኝ ችላ ስለው . . ለደበረው  ሰው አዚ ጋ አንድ ፍቅር አምጣለት ማለት ስከጅል ምን አልኩ መሰለሽ ..... 'ባልወድሽ ኖሮ ድብርትን አልችለውም ነበር '     ©Adhanom Mitiku

"ምን ያሀል ነው የምትወጂኝ...."...ብሎ የጠየቀኝ በጠራራ ለሊት 6 ሰአት ላይ ደውሎ ነበር....ብቻውን ነው የሚኖረው...እኔ ደግሞ ከቤተሰቦቼ ጋር....የምተኛውም ከእህቶቼ ጋር ነው...ገና ስልክ ማውራት ከመጀመሬ ታናሽ እህቴ ማንኮራፋቷን ገታች....ነቅታለች ማለት ነው....ድምፄ እንዳይሰማ ጭንቅላቴ ላይ ትራስ ጫንኩ....ልፊ ሲለኝ ነው እንጂ ሚስጢር ሲወራ እንኳን ጓረቤት የሚሰማበት አፍና አፍንጫ የሆነ ሰፈር እየኖርኩ ድምፄን እንኳን በትራስ በምንም እንደማልቀንሰው አውቃለሁ....እንደውም እኛ ለአይጦች በሸጎጥነው መርዝ አይጡ የሚሞተው ጎረቤት ሄዶ ነው...ይሄን ያህል ነው የቤቶቹ ቅርርብ። "የሆንከው ነገር አለ"....ጠየቅኩ....መቼስ በጤናው አይሆንም ብዬ....እውነቴን እኮ ነው...በቀን ሰላሳ ጊዜ የምነግረውን እውነት በለሊት መጠየቅ ምን ይሉታል.... "ምንም አልሆንኩም...ንገሪኝ እስኪ ምን ያሀል....." "ሉሌ ጠጥተሀል እንዴ....?".....ስሙ አለማየሁ ነው....ጓደኞቹ እና የቅርብ ሰዎች "አሌክስ" ይሉታል....እኔ አለም አየሁ እንዴት ሆኖ ተቆላምጦ አሌክስ ጋር እንደደረሰ ስለማይገባኝ ማንም የማይጋራኝን ስም አወጣሁለት..."ልዑል"....ብዬ.... ደሞ አዎ ለእኔ ልዑል ነው..... "አልጠጣሁም...አልጠጣሁም....የተጠየቅሽውን ብቻ መልሺ አትቀበጣጥሪ!!"....ለመጀመሪያ ጊዜ ነው እንዲህ በንቀት ሲያወራኝ...ይጠጣም አይጠጣም እኔ እንዲህ አይነቱን ነገር አልታገስም....አዎ ትዕግስት እንደሌለኝ ይወራል....'ኤፊ እኮ ነገሮችን በዝምታ አታሳልፍም....'...ይሉኛል....ይሄ የማሳለፍ የማላሳለፍ ጉዳይ ሳይሆን የክብር ጉዳይ ነው...በክብሬ ከተመጣ ልዑሉን ወደ ባሪያ ለመፈጥፈጥ አልዘገይም.... ጆሮው ላይ ስልኩን ዘጋሁት...... ጠዋት ለማኝ ሳያራ ደወለ....አላነሳሁትም...ቀኑ እሁድ ነበር...  እሁድ እለት ቤተሰቤ ከቤተክርስትያን እና እድር ለመክፈል ከመውጣት ውጪ ደጅ ደጅ የሚል የለም....ቡናችንን አጫጭሰን የቤተሰብ ግዜ የምናሳልፍባት ቀናችን ናት.... አባቴ ከእድር ሳይመለስ ቁርስ ለማድረስ እናቴ ጉድ ጉድ ይዛለች...በሩ ተንኳኳ....ታናሽ እህቴ ተቅለብልባ በሩን ከፈተች.... "ኤፊ ሰው ይፈልግሻል"....ስትለኝ ቤቴን ለአለማየሁ ያሳየሁበትን ቀን ረገምኩት.... እናቴ ሳትሰማ ሹልክ ብዬ ወጣሁ....ስወጣ የጎረቤት ሰው እንዳለ ልብስ እያጠበ ነው....ብዬ የማላውቀውን 'እንደው ምን ነካቸው በሰንበት'....ብዬ ታዘብኳቸው....አይናቸው ሊበላን ደረሰ....ዝም እንደተባባልን ከፊታቸው ዘወር ወደምንልበት አቅጣጫ መራሁት... ሰላም ሊለኝ ሲጠጋኝ በቅፅበት አር የነካው እንጨት አረኩት...ሸከከኝ.... "ትናንት እኮ ትንሽ ጠጥቼ ነበር....አስቀየምኩሽ እንዴ...."....አንገቱን በሼም አኳሀን እያሸ ይቺን አለ... "ምን ፈልገህ መጣህ...." "ትንሽ ያካበድሺው አይመስልሽም...." "አይመስለኝም...." "እሺ ይቅርታ...."....ትዕቢት ያለበት ይቅርታ ነው...አልተዋጠልኝም.... "መቼ ነው እንደዚህ የተናናቅነው...." "በእናትሽ አታካብጂ...መሬት አይንካኝ አልሽሳ...."...ይቺን ትወዳለች የሰውየው ልጅ ጨስኩ.... "በፊቱንም ውስጥህ የነበረው ነው ስትጠጣ ያወጣኋው...." "ቆይ አንዴ ላስረዳሽ...." "ምን ብለህ ነው የምታስረዳኝ ይሄን...ብቻ እንኳን አወቅኩህ...ከዚህ በኋላ አጠገቤ እንዳትደርስ...."....አምባረቅኩበት....ዘወር ስል አባቴ ወደ እኛ ሲመጣ አየሁት.... "አሁን ሂድ....".....መልስ አልሰጠኝም....ሄደ....አባቴን ጠበቅኩት.... "ምንድን ነው ልጄ...."....አይኔ እምባ አቅርሯል.... "ማነው...." "የሶስት አመት ፍቅረኛዬ...."...መቼስ ሴት ልጅ 25 ካለፈች ወዲህ ብዬ ነው የነገርኩት.... "ምን ተፈጥሮ ነው...?...." "ተለያየን...." "ለምን...." "ለእኔ ክብር የለውም...እሱን ያወቅኩት ደሞ ትናንት ገና ነው...."....አልኩት ከነ ሳጌ... "እና ደስ ሊልሽ እኮ ነው የሚገባው... " "አዎ አባ...ደስ ብሎኛል...ግን ታውቀኝ የለ እምባዬ ቅርብ ነው...የሚቀጥለው ሳምንት ሽማግሌ ሊልክ ነበር...ለአመታት የገነባሁት ፈረሰ...ቢያንስ ከልቡ እንኳን 'ይቅርታ' ቢለኝ ምን አለ...." "አልቅሺ አልቅሺ ይውጣልሽ...."....ብሎ አቀፈኝ.... "አባዬ ያንተ ልጅ ነኝ...አንተ እንዳስተማርከኝ ነው ያደረግኩት...." "ጎሽ ልጄ ደግ አደረግሽ...ፍቅር ያልቃል....ፍቅር አልቆ ቤተሰብ ሳይበትኑ የመኖር ሚስጢሩ ደግሞ መከባበር ነው....ደግ አረግሽ...የማያከብርሽ ወንድ ምን ያደርግልሻል....." የምጠላውን እውነት ደግሞ አለኝ..... "ልጄ ፍቅር አልቆ በመከባበር ብቻ የምትኖሪበት ጊዜ ይመጣል....ደግ አረግሽ....".....ተያይዘን ወደ ቤታችን ሄድን..... ✍Shewit

አለም አቀፍ ደረጃዉን የጠበቀዉን ፕሉላር ሳይት የኦንላይን መማሪያ ድህረገጽ፤ በ5706 ብር ብቻ ሳፋሪኮም ታለንት ክላዉድን በመቀላቀል ተጠቃሚ ይሁኑ። ጀማሪ ወይም ብዙ ልምድ ያካበታችሁ ባለሙያ ብትሆኑም ሳፋሪኮም ታለንት ክላዉድ ሁሉንም ደረጃዎች የሚመጥኑ ኮርሶችን አዘጋጅቷል። እራስዎን የማሳደግ ጉዞዎን በ safaricom.gebeya.com ዛሬ ይጀምሩ!