ឧកញ៉ា News Feed

លោកអ្នកឧកញ៉ា លី យ៉ុងផាត់ អញ្ជើញបើកពិព័រណ៍អាពាហ៍ពិពាហ៍ ប្រចាំឆ្នាំ២០២៤ លោកអ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា និងជាប្រធានក្រុមប្រឹក្សាភិបាលក្រុមហ៊ុន LYP Group និងលោកជំទាវ នៅថ្ងៃទី២០ ខែកញ្ញានេះ បានអញ្ជើញចូលរួមពិធីបើកពិព័រណ៍អាពាហ៍ពិពាហ៍ ប្រចាំឆ្នាំ២០២៤ ក្រោមអធិបតីភាព លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នៅមជ្ឈមណ្ឌល ដឺ ព្រេមៀ សេនធ័រ សែនសុខ។ ព្រឹត្តិការណ៍ពិព័រណ៍អាពាហ៍ពិពាហ៍លើកទី១ ប្រចាំឆ្នាំ២០២៤ ធំបំផុតមិនធ្លាប់មាននៅកម្ពុជានេះ ធ្វើឡើងដើម្បីជួបជុំនូវក្រុមហ៊ុនផ្តល់សេវាកម្មរៀបចំពិធីមង្គលការដ៏សម្បូរបែប រួមមានទាំងសម្អាងការ ចុងភៅ ពិធីការ ការតុបតែង ថតរូប ភេសជ្ជៈ គ្រឿងអលង្ការ និងសេវាកម្មពាក់ព័ន្ធជាច្រើន រួមគ្នាប្រមូលផ្តុំគ្រប់សេវាកម្មអាពាហ៍ពិពាហ៍ទាំងអស់ មកដាក់តាំងបង្ហាញនៅមជ្ឈមណ្ឌល ដឹ ព្រេមៀ សែនធ័រ សែនសុខ រាជធានីភ្នំពេញ។ បន្ថែមពីនោះ កម្មវិធីធ្វើឡើងរយៈពេល៣ថ្ងៃ ចាប់ពីថ្ងៃទី២០-២២ ខែកញ្ញា ដោយមានកម្មវិធីបញ្ចុះតម្លៃជាច្រើនមហាសាលពីសំណាក់ដៃគូរសហការណ៍ឧបត្ថម្ភ រួមជាមួយការប្រគុំ Concert ដែលមានការចូលរួមពីកំពូលតារាចំរៀងល្បីៗប្រចាំព្រះរាជាណាចក្រកម្ពុជា និងការសម្តែងសិល្បៈ ព្រមទាំងលេងហ្គេមកម្សាន្តដើម្បីយករង្វាន់ផ្សេងៗផងដែរ៕ 📷នាំមកជូនដោយ៖ ក្រុមហ៊ុន វិរៈប៊ុនថាំ អេចប្រេស

ជំទាវអ្នកឧកញ៉ា ម៉ៅ ចំណាន ចុះពិនិត្យទីតាំងសាងសង់អគារស្នាក់ការថ្មីរបស់សមាគមសិល្បករខ្មែរ លោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ នាថ្ងៃទី១៩ ខែកញ្ញា បានអញ្ជើញចុះពិនិត្យទីតាំងដែលកំពុងដំណើរការសាងសង់អគារស្នាក់ការថ្មីរបស់សមាគមសិល្បករខ្មែរ ស្ថិតនៅតាមបណ្ដោយផ្លូវ៣៧៦ សង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ ដើម្បីរៀបចំទីកន្លែងសមរម្យក្នុងការបំពេញការងារជូនថ្នាក់ដឹកនាំ ក៏ដូចជាបុគ្គលិករបស់សមាគមសិល្បករខ្មែរ ជាពិសេសបង្កលក្ខណៈងាយស្រួលជូនដល់សិល្បករ-សិល្បការិនី ដែលមានតម្រូវការសេវានានារបស់សមាគម។ សូមជម្រាបថា សមាគមសិល្បករខ្មែរ ត្រូវបានបង្កើតឡើងនៅឆ្នាំ២០០៦ ដោយគិតមកដល់ពេលបច្ចុប្បន្ននេះ មានអាយុកាល ១៨ ឆ្នាំ ឬ ៦ អាណត្តិមកហើយ។ សមាគមបានចូលរួមដល់ការលើកកម្ពស់តម្លៃសីលធម៌សង្គមរបស់សិល្បករខ្មែរ ដើម្បីរក្សាឱ្យបាននូវកិត្តិយសស័ក្តិសមជាសិល្បករ សិល្បការិនីតំណាងជាតិ តាមរយៈការអភិរក្ស អភិវឌ្ឍន៍សិល្បៈវប្បធម៌ជាតិ និងចងក្រងសមាជិកដែលជាកម្លាំងស្នូល។ សមាគមក៏បានរកៀរគរសប្បុរសជន និងអ្នកមានលទ្ធភាព ដើម្បីជួយដល់ការលើកស្ទួយសិល្បៈ និងវប្បធម៌ ជាពិសេស គឺស្វែងរកធនធាន សម្រាប់ការបណ្តុះបណ្តាល និងដុសខាត់សមត្ថភាពយុវសិល្បករ ឱ្យបង្កើតនូវស្នាដៃសិល្បៈថ្មីៗ៕ 📷នាំមកជូនដោយ៖ ក្រុមហ៊ុន វិរៈប៊ុនថាំ អេចប្រេស

អ្នកឧកញ៉ា សួរ វីរៈ៖ រាល់ការចែករំលែកបទពិសោធន៍ដល់បុគ្គលិក ជាផ្នែកមួយចូលរួមអភិវឌ្ឍន៍ជាតិ នៅលើ​បណ្តាញ​សង្គម​ហ្វេសប៊ុក នា​ថ្ងៃទី១៨ ខែកញ្ញា អ្នកឧកញ៉ា បាន​លើក​ឡើង​ថា៖ “រាល់ការចែករំលែកបទពិសោធន៍​ ផ្តល់​ការ​អប់រំ ផ្តល់អនុសាសន៍ ដល់បុគ្គលិកគ្រប់ផ្នែក បើទោះបីវាមិនបានការផ្តល់ផល់ប្រយោជន៍ ការតបស្នង​ត្រលប់​មកក្រុមហ៊ុនវិញក៏ដោយ តែវាជាកេរ្តិ៍តំណែល​ដែលអាចផ្តល់អនាគតដល់គាត់ ក្រុមគ្រួសារគាត់ពេញមួយជីវិត ហើយក៏ជាផ្នែកមួយក្នុងការចូលរួមអភិវឌ្ឍន៍សង្គមជាតិ! #វប្បធម៌ចែករំលែក”។ សូមជម្រាបថា អ្នកឧកញ៉ា សួរ វីរៈ ម្ចាស់ក្រុមហ៊ុន វិរៈប៊ុនថាំ អេចប្រេស គឺជា​អ្នកជំនួញ​ដែល​តែង​​ចូលរួម​យ៉ាង​សកម្មក្នុងការ​ជួយ​អភិវឌ្ឍ​ដល់​ប្រទេសជាតិ។ អ្នកឧកញ៉ាអគ្គនាយក និងគ្រួសារ​ក្រុមហ៊ុន វិរៈប៊ុនថាំ តែងតែ​ចូលរួម​ជួយ​បរិច្ចាគ​ថវិកា​ក្នុង​កម្មវិធីសប្បុរសធម៌នានាជាច្រើន ដូចជា ចូលរួមជាមួយកាកបាទក្រហមកម្ពុជា ការជួយឧបត្ថម្ភដល់មន្ទីពេទ្យគន្ធបុប្ផា និងការជួយដល់សាលារៀន​ជា​ច្រើន​កន្លែងផងដែរ៕

កក្រើកភ្ញៀវទេសចរណ៍! ឧកញ៉ា ខេមរៈ សិរីមន្ត គ្រងឈុតព្រះបាទជ័យវរ័្មនទី៧ ក្នុងព្រឹត្តិការណ៍ GUMBALL 3000 នៅមុខប្រាសាទអង្គរវត្ត កំពូលតារាចម្រៀងលោកឧកញ៉ា ខេមរៈ សិរីមន្ត បានបង្ហាញមុខដោយគ្រងឈុតព្រះបាទជ័យវរ័្មនទី៧ យ៉ាងស្រស់ស្អាតឈរបង្ហាញរាងនៅមុខប្រាង្គប្រាសាទអង្គរវត្ត ក្នុងព្រឹត្តិការណ៍ Gumball 3000 រួមជាមួយនិងរថយន្តទំនើបរបស់ខ្លួន ដែលនេះជាផ្នែកមួយក្នុងការចូលរួមលើកស្ទួយវិស័យទេសចរណ៍នៅក្នុងប្រទេសកម្ពុជា។ ព្រឹត្តិការណ៍ប្រវត្តិសាស្រ្ត Gumball 3000 បានរៀបចំឡើងតាំងពីថ្ងៃទី ១៥ ខែកញ្ញា ដល់ថ្ងៃទី ១៧ ខែកញ្ញា ដោយមានក្បួនរថយន្តរបស់ Gumball 3000 ដែលមកពីបណ្តាប្រទេសជាច្រើនចម្រុះជាតិសាសន៍ចូលរួមយ៉ាងច្រើនកុះករ ក៏ដូចជាការតាំងបង្ហាញរថយន្តទំនើបៗក្នុងទឹកដី ខេត្តសៀមរាប ដោយទទួលបានការជ្រោមជ្រែងពីក្រសួងទេសចរណ៍ សហការជាមួយក្រុមហ៊ុន ជីបម៉ុង អាជ្ញាធរ និងស្ថាប័នពាក់ព័ន្ធនានា។ ព្រឹតិការណ៍នេះប្រជុំទៅដោយតារាល្បីៗដែលមានរថយន្តទំនើបៗ និងអ្នកជំនួញល្បីៗទូរទាំងប្រទេសចូលរួមអបសាទរ ដើម្បីលើកស្ទួយវិស័យទេសចរណ៍នៅក្នុងប្រទេសកម្ពុជា ៕ 📷នាំមកជូនដោយ៖ ក្រុមហ៊ុន វិរៈប៊ុនថាំ អេចប្រេស

លោកអ្នកឧកញ៉ា អ្នកឧកញ៉ា ឧកញ៉ា សមាជិកសមាគមឧកញ៉ាកម្ពុជា អញ្ជើញចូលរួមពិសារអាហារពេលល្ងាច ជាមួយប្រតិភូ GUMBALL 3000 មុខប្រាសាទបាយ័ន លោកអ្នកឧកញ៉ា អ្នកឧកញ៉ា និងឧកញ៉ា ជាថ្នាក់ដឹកនាំក៏ដូចជាសមាជិកនៃសមាគមឧកញ៉ាកម្ពុជា ជាច្រើនរូបបានអញ្ជើញចូលរួមក្នុងកម្មវិធីពិសេស Gala Dinner នៅមុខប្រាសាទបាយ័ននាខេត្តសៀមរាបដែលបានប្រារព្ធធ្វើឡើងកាលពីរាត្រីថ្ងៃទី១៦ ខែកញ្ញា ដើម្បីជាកិច្ចស្វាគមន៍ឲ្យបានសមរម្យ និងសាកសមក្នុងនាមជាម្ចាស់ផ្ទះ ទទួលស្វាគមន៍ឲ្យបានកក់ក្តៅប្រតិភូ ជាភ្ញៀវកិត្តិយសជាតិ និងអន្តរជាតិ ដែលបានធ្វើដំណើរមកចូលរួមព្រឹត្តិការណ៍ Gumball 3000 x Chip Mong in Cambodia ។ គួរឲ្យដឹងផងដែរថា Gumball 3000 សហការជាមួយក្រុមហ៊ុន ជីប ម៉ុង គ្រុប រៀបចំព្រឹត្តិការណ៍នេះឡើង ធ្វើឲ្យកេរ្តិ៍ឈ្មោះរបស់កម្ពុជាកាន់តែបង្កើននូវកិត្យានុភាពជាតិ និងវិស័យទេសចរណ៍ ជាពិសេសបង្កើនការផ្សព្វផ្សាយយុទ្ធការ «ទស្សនាសៀមរាប២០២៤» ព្រមទាំងដើម្បីប្រមូលថវិកាបរិច្ចាគជូនមន្ទីរពេទ្យកុមារអង្គរ ខេត្តសៀមរាប និងជាឱកាសជំរុញការវិនិយោគ ពាណិជ្ជកម្ម និងការអភិវឌ្ឍសេដ្ឋកិច្ចផងដែរ ដ្បិតប្រតិភូជាង៤០% សុទ្ធសឹងជាពាណិជ្ជករធំៗ៕ 📷នាំមកជូនដោយ៖ ក្រុមហ៊ុន វិរៈប៊ុនថាំ អេចប្រេស