Маъмура Муҳаммад ижод канали.

* * * Жиндаккина оғриғим бор шу кўксимда, Жиндаккина ташвишларга бефарқдайман. Насибасин йўлакларга сочиб кетган, Хазон янглиғ тўзғиб ётган баргдайман. Осмон кўнглим, арзон кўнглим, пайҳон кўнглим Гоҳи подшоҳ, гоҳи мискин, вайрон кўнглим Ҳатто шамол чертиб ўтмас саройига, Ўзи султон, ўзи карвон, бир хон кўнглим. Қорачиқлар тиниб борар, синиб борар Кўрганига сўз демасдан кўниб борар, Бу оламнинг пасту, баланд сўқмоқлари Шундоққина теграсидан ўтиб борар. Баъзан оғир юкун ортар шоирлигим, Ёки сўзга тушмасмикан оғирлигим, Ё, Яратган гуноҳимдан ўтгин агар! Исёнларга ортиб кетса мойиллигим! Битта ўзим, айтар бўлган сўзим битта Бахт меники, ғам меники, тўзим битта Айбламасман мени мендек тушунмасни, Кетар бўлсам борарим нақд, йўлим битта. 18.09.2024 ©Маъмура Муҳаммад @Mamura_Muhammad_sherlari

© Бибисора Туробова шеъри https://t.me/Adabiyot_olami

ЎЛСАМ ЖАНОЗАМНИ БУЛБУЛ ЎҚИСИН... Ўлсам, жанозамни булбул ўқисин, Куйиб ўтган умрим шарҳини айтсин. Бардошим ҳақида ашъор тўқисин. Мендан норозилар фикридан қайтсин. Ўлсам, жанозамни булбул ўқисин, Айтолмай қолганим десин Аллоҳга. Саловатлар айтсин тўплаб бор кучин,“” Билмаган билганим десин Аллоҳга. Ўлсам, олов таним муз билан ювинг, Токи, кафанларим кетмасин куйиб. Ювгач, юрагимга парча муз қўйинг, Борай ҳузурига озгина совиб. Ўлсам кафанимни булутдан қилинг, Ёмғирга айлансин ёнсам қабрда. Қабримни қазсангиз сал кенгроқ олинг, Гуноҳкор бандага тор гўр жабрда. Ўлсам, чинор экинг қабрим бошига, Токи, соясида тиловат ўқинг. Чўмилиб яшадим кўзим ёшига, Йиғламанг, сиз фақат тиловат ўқинг. Кичкина ясатинг қабртошимни, Қуръон оятларин ёздиринг ўйиб. Ёзманг қабртошга умрим, ёшимни, Мен сафарга кетдим, чориғим кийиб. Ўлсам, оёқ томон, ўнг томонимга, Тўрт киши сиғарлик курси ясатинг, Соғиниб келсангиз Ихлосни ўқинг, Қабримни гул эмас, Қуръон безасин. Ўнг тарафдан келинг, оёқ тарафдан, Токи, кўрсин сизни очиқ кўзларим. Ўлим ҳақ эканин оласизда тан, Қувонай, келди деб ўғил-қизларим. Ўлсам йўқлаб туринг. Билинг, кутаман, Чунки, сиз деб ўтдим ўзимдан кечиб, Йўқламай қўйсангиз, зардоб ютаман, Ётаман гўрда ҳам кўз ёшим ичиб. Ўлсам, умрим шарҳин набираларга, Яширмай, ўчирмай борини сўзланг. Интиқ кутганими уларни ҳамда Ёниб ўтган кўнглим зорини сўзланг. Ўлсам, шеърларимни авайлаб асранг, Имконини топиб топширинг элга. Биламан, эл ўқир соғиниб, севиб, Ўтар ёзганларим қўллардан қўлга. Ўлсам, аҳил бўлинг, меҳрибон бўлинг, Имконин топсангиз тўланг қарзимни, Дуосини олинг мен севган элни, Мерос қолдираман сизга сабримни. Ўлсам, жанозамни булбул ўқисин... ✍Бибисора Туробова @Mamura_Muhammad_sherlari

#Таъзия “Жанозамни булбул ўқисин” шеъри муаллифи вафот этди Ўзбекистон Ёзувчилар уюшмаси аъзоси, таниқли шоира Бибисора Туробова бугун, 15-сентябр куни 72 ёшида вафот этди. Марҳума оила аъзолари ва яқинларига ҳамдардлик билдирамиз. Бибисора Она Дўрмоннинг файзи эди, қандай ижодкор бормасин биринчи ўринда Бибисора онани йўқлардилар. Ҳеч бир йғилиш уларнинг иштирокисиз ўтмасди десам хато бўлмас.. Дўрмон яна бир суюкли шоирасидан айрилди. Аммо марҳуманинг номи, ижодлари орқали халқ қалбида яшашига аминман! Охиратлари обод, руҳлари оромда бўлсин! @Mamura_Muhammad_sherlari

Шавкат Раҳмон шеъри. Маъмура Муҳаммад ижроси. @Mamura_Muhammad_sherlari

Бугун атоқли шоир Шавкат Раҳмон таваллуд топган кун! Охиратлари обод бўлсин!

* * * Наҳот шеърлар айтдим бўшлиққа қараб, наҳотки соврилди олов сўзларим, наҳотки ҳақ бўлса, элу юрт асли қуруқ сўзлар, деган гумроҳ дўстларим?! Наҳот, бекор ўтди гулдай умримнинг минг йилга татирлик олтин чоқлари, наҳот бирор руҳни уйғотолмади шоир юрагимнинг қалдироқлари?! Наҳотки, бирорта дилга етолмай, беҳуда сарфланиб қанча куч-чидам, келиб кетаверар ёруғ дунёга, келиб кетаверар мендай куйчилар?! **** Ҳаммамиз қуёшда куйган жиззамиз, қачон тиз чўкувдик, ҳамон иззамиз, сирқираб оғрийди шишган тиззамиз, ўриндан озгина турсак майлиму? Ўтганлар бари бек, қолган жавдирар, гарданда кўринмас ғуллар шалдирар, меҳнатдан ёрилган қўллар қалтирар, ўз беким ерида юрсак майлиму? Насимлар гулламиш озод тоғларда, озодлик муждаси сўлу соғларда, боболар қийналиб тиккан боғларда ағанаб бир хаёл сурсак майлиму? Неча минг аллома, жўмардлар ўлган, тафаккур сасиган, руҳлари сўлган, уруғлар айниган тап-тақир чўлда ўз беким давлатин қурсак майлиму? Юз эллик йилдирки мана шу ҳолат, ҳануз давом этар маккор тижорат, билмадим, қаердан ушбу жаҳолат, нега сиз бўлмайсиз сира хижолат? Нега мен сўрайман сиздан ижозат?! Шавкат Раҳмон