Oromia Water and Energy Bureau - OWEB

Qisaasama bishaanii hir'isuun bu'a qabeessummaa tajaajiloota bishaanii guddisuuf hojjetamaa jira ======== #BBIO-(Fulbaana 9/2017)- Biiroon Bishaaniifi Inarjii Oromiyaa rakkoo qisaasama bishaaniin gahu hir'isuun bu'a qabeessummaa dhaabbilee tajaajila Bishaaniifi Dhangala'aa Magaalotaa jahaa olguddisuuf xiyyeeffannoon hojjechaa jira. Biirichi deggarsa Maallaqaa Baankii Addunyaarraa Doolaara Mil. 1.7 ol argameen waliigaltee tajaajila gorsaa Dhaabbata Idil-Addunyaa 'NIRAS' fi 'Ketama Sub Consultancies jedhaman waliin mallatteeseen Magaalota Oromiyaa jaha (Adaamaa, Asallaa, Bishooftuu, Jimmaa, Naqamtee fi Shashaamanneetti) qorannoo qisaasamaan Bishaan galiin irraa hin argamne (NRW) irratti gaggeeffamaa jiru ilaalchisee gabaasa qorannoo jalqabaa dhihaatefirratti qooda fudhattoota waliin har'a Finfinneetti mari'ate. Marii Kanarratti waraqaan qorannoo duraa Karoora tarsiimoo'aafi kallattii raawwii dhimmisa Bishaanii hir’isuu, Malawwanii fi qophii karoora hojii Magaalota kanneenii qorattootaan dhihaatanii gadifageenyaan irratti mari'atameera. Work-shooppii kana haasaadhaan kan saaqan Itti Aanaa Hogganaa Biiroo Bishaaniifi Inarjii Oromiyaa Inj. Kunuz Ahimadi. InjInar Kunuz akka dubbatanitti tajaajiloota bishaanii baayyee keessatti bishaan baasii guddaan itti bahee oomishame keessaa yoo xiqqaate %30-40 % ummata bira osoo hin gahin qisaasamaa jira. Akkasumas galii dhaabbileen argatan hangasumaan gadi buusa. Kun immoo yeroodhaa gara yerootti humna Dhaabbilee tajaajila bishaan dhugaatii bu'aa argachuu qaban dhabsiisuun dadhabsiisaa deema jedhan. Dabalataanis hanqinni bishaan dhugaatii magaalaa keessatti akka muudatuufi tajaajilli humna maallaqaa qabaatee hojii babalisuu garaagaraa akka hin gaggeessine danqa. Rakkoo kana bu'uurarraa furuuf siistama bishaan dhugaatiifi dhangala'aa keenya sirnaan beeknee hubannoon tajaajila kenninu , tekinooloojiin deeggarree dhimmisaa ykn bishaan galiin irraa hin argamne xiqqeessuu, ciccitiinsa dhiheessa bishaan dhugaatii hanbisuufi rakkoo qulqullina/sanitation magaalota keenya keessatti mul'atan furuuf qorannoon kun murteessaa ta'uu himan. Dhaabbileen tajaajiloota bishaanii carraa kana argatan qorannoo jalqabaa (inception report ) dhihaate yaadaan gabbisuu cinatti, qorannoon kun akka milkaa'uuf hanga xumura qorannichaatti deggarsa isaanirraa eegamu akka taasisan dhaaman. Marii kanarratti Hoggantoonnifi ogeessonni dhaabbilee Tajaajiloota Bishaan dhugaatiifi dhangala'aa Magaalota jahanii dabalatee qooda fudhattoonni Biiroo fi Ministeera Bishaaniifi inarjiirraa argaman hirmaataniiru. Gabaasa qorannoo duraa dhihaate erga gadifageenyaan xiinxalanii booda yaadota qeeqaafi galtee qorannichaa ta'an kaasuun qorannichi furmaata waaraa akka argamsiisu danda'utti gadifageenyaa raawwatamuu qaba jedhanii, milkaa'insaatifis gahee irraa eeegamu akka bahan ibsan. Dhumarrattis Ministeera Bishaaniifi Inarjii Mootummaa Federaalaatti dursaa garee Teekinikaafi gorsaa kan ta'an Obbo Nagaash Addunyaa fi BBIOtti Qindeessaan Sagantaa 2nd Urban Water Supply & Sanitaion Inj. Isheetuu Tufaa Dhaabbanni NIRAS yaadota qooda fudhattootarraa ka'e galtee godhachuun yeroo itti aanu keessatti qorannoo xumuraa qulqullinaafi sadarkaa idila Addunaa guute hojjetanii akka dhiheessan yaadachiisan. Odeeffannoolee adda addaatiif Marsaalee Hawaasaa keenya sirriitiin nu hordofaa 👇🏽 Telegram ➲ https://t.me/oromiawaterandenergy Facebook ➲ https://www.facebook.com/oromiawaterandenergy Twitter ➲ https://twitter.com/oromiawater_ YouTube ➲ https://www.youtube.com/@oromiawaterandenergy Instagram ➲ https://www.instagram.com/oromiawaterandenergy LinkedIn ➲ https://www.linkedin.com/company/oromiawaterandenergy Website ➲ https://oromiawaterandenergy.org

Imala Dhaabbata Tajaajila Bishaan Dhugaatiifi Dhangala’aa Magaalaa Abboo-Gudar =======(Kutaa 2ffaa) #BBIO-(Fulbaana 8/2017)- Dhaabbanni tajaajila Bishaan Dhugaatii fi Dhangala’aa Magaalaa Amboo-Gudar rakkoo bishaan dhugaatii qulqulluu Magaalichi qabu hiikuudhaaf waggoota torban darban keessa hojiilee gurguddaa hojjechaa akka ture hoji geggeessaan dhaabbatichaa Obbo Dhaabaa himaniiru. Baajata liqaa baankii Adunyaa, kan deggerttoota Dhaabbatichaarraa argame, bajata dhaabbatichaafi hirmaannaa hawwaasaa dabalatee walumatti qarshii miiliyoona 264 oliin pirojektoota adda adda babbal’isuufi fooyyessuun danda’ameera. Kennni tajaajila bishaan dhugaatii Magaalaa Amboo keessatti harka 100 irra gahee kan ture yeroo ammaa baayyina ummataafi haala jijjiirama qileensaatiin kan ka’e gara %89tti gadi bu’ee jira jedhu Inj. Dhaabaan. Haa ta’u malee ammas Magaalicha keessatti yeroo rakkoowwan xixxiqqoon mudatan, yeroo roobaa fi bakka tabba ta’an irratti darbee darbee ciccitiinsi mudaturraan kan hafe ummanni magaalichaa yoo xiqqaate fageenya meetira 200 irratti guutummaan guutuutti bishaan yeroo hunda argataa jiru. Akka Inj Dhaaban jedhanitti bara 2015 darbe keessatti bishaan iddoo hundatti dhaqqabamaa akka ta’uuf km 3 kan ta’u hojiin fooyyessuufi babbal’isuu hojjetamee ture. Bara kanas(2017) deggersa qarshii miliyoona 23 biyya alaa irraa argameen sarara bishaanii km 9 ol diriirsuun, maamiloota harka qalleeyyii 1200f bishaan galchuufi namoota 10f mana fincaanii qotuuf caalbaasiin isaa xumuramee, bitaan meeshaalee adda addaa geggeefamaa jira. Akkuma baayyinni ummataa guyyaadhaa gara guyyaatti dabalaa jiru hojiin bu’uuraalee misoomaa adda addaas magaalattii keessatti baabbal’achaa waan jiruuf rakkoon bishaan dhugaatii gara fuula duraatti akka hin mudanneef dhaabbatichi karoora hiixataa baafatee hojjechaa jira. Bara 2016 keessatti bool’a lama qotuuf dhaabbata ijaarsaa OCC waliin qarshii miiliyoona 56 walii galamee hanga ammaatti qarshiin miliyoona 17 kaffaltiin duraa kaffalameefii isaanis bool’a tokko qotanii bishaan per sekondiitti leetira 60 ol kennaa jira. Bool’a lammataas roobni yeroo caamutti kan hojjetamu ta’a. Kaayyoon pirojektii qotiinsa bool’aa kun waa lama akka furuu danda’us kaasan Inj. Dhaabaan. Inni duraa ciccitiinsa bishaan dhugaatii yeroo Gannaa akka magaalaatti mudatu hanbisuufi bakka tabbaatti bishaan ol ba’uu diduun hanqina mul’atu furuufi. Inni lammaffaa qorannoon akka adda bahetti Magaalaan Guddar bishaan persentaa 20 argachaa waan jirtuuf bara 2015 irraa kaasee magaallii Guddar saatalaayitii tokko ta’ee magaalaa Amboo jalatti akka dabalamu taasisuun rakkoo bishaan dhugaatii magaalaa kanaa furuufis xiyyeeffannaa addaatiin kan hojjetamaa jirudha. Hawaasni Magaalichaa tajaajila dhaabbatichi kennaafii jirutti baayyee gammadoodha. Hawaasni Magaala Gudaris Akkuma hawaasa magaalaa Amboo rakkoo hanqina bishaan dhugaatii qabau akka furamuuf abdii horatanii eeggachaa jiru. #Muuxxannoo_gaarii Dhaabbata Tajaajila Bishaan Dhugaatiifi Dhangala’aa Magaalaa Amboo-Gudar -------- Biiroon Bishaaniifi Inarjii Oromiyaa hawaasa hirmaachisuun Bishaan dhugaatii qulqulluu waliin gahuudhaaf hojiiwwan gurguddoo iddoowwan gara garaatti hojjechaa jira. Tajaajiloonni bishaaniis galii argataniin pirojektoota adda addaa hojjechuun jiraattonni magaalaafi naannawasaanii jiran tajaajila bishaan dhugaatii dhiheenyatti argachuu akka qaban sirna diriirsee hojiirra oolchaa jiru. Bu’uuruma kanaan Tajaajilli Bishaan dhugaatiifi dhangala'aa Magaalaa Amboo-Gudaris hojii muuxannoo gaarii ta'an magaalicha keessatti hojjechuun hawaasa magaalichaaf tajaajila gahaa kennaa jira. Kana malees hojii dhaabbilee walfakkaatoo biroof muuxannoo ta’uu danda’u raawwatee jira. Magaalaa Ambootti hawaasni bishaan dhugaatii sirnaan akka argatuuf Teekinoloojii ’Global Information Sestem(GIS)’ mala iddoo tokkoo ykn waajjira keessa taa'anii sarara bishaanii ittiin to'atan hojiirra oolee tajaajilli guutuun itiin kennamaa jira.

Magaalaan Amboo damee Magaalaa Guddar osoo hin dabalatin maamila kuma 23 ol qabdi, baayyina ummataafi lakkoofsa hawaasa bishaan galfatee yeroo walbira qabnee ilaalu wal hinsimu kunimoo seera dambii haaraa baheen namni bishaan galfachuu danda’u nama kaartaaf pilaanii qabu qofa waan ta’eefi. Kanneen ulaagaa guutaniifi kaartaaf pilaanii manaa qaban hundi bishaan galfatanii jiru. Bara darbe keessatti lakkooftuu haaraa gosa adda addaa, dijitaalaa fi manuuwaala ta’an deggersaan 400 biyya ’Netherlaand’ irraa galchuun namoota harka qaleeyyii dabalatee bishaan galchatan itti tajaajilamaa jiru. Lakkooftuuwwan kanneen 100 ta’an dijitaala. Isaan keessaa 60 walta’iinsa Chaayinaa waliin taasifameen Sim-kaardiin kan hojjetan yaaliif namoota 4 galanii itti tajaajilamaa jiru. Muuxannoon kun eddoo adda addaattis osoo babal’atee gaariidha jenna. Horaa bulaa! Odeeffannoolee adda addaatiif Marsaalee Hawaasaa keenya sirriitiin nu hordofaa 👇🏽 Telegram ➲ https://t.me/oromiawaterandenergy Facebook ➲ https://www.facebook.com/oromiawaterandenergy Twitter ➲ https://twitter.com/oromiawater_ YouTube ➲ https://www.youtube.com/@oromiawaterandenergy Instagram ➲ https://www.instagram.com/oromiawaterandenergy LinkedIn ➲ https://www.linkedin.com/company/oromiawaterandenergy Website ➲ https://oromiawaterandenergy.org

#Fandii_Qabeenyaa_Bishaanii hojiirra oolchuun fayyadamummaa ummataa mirkaneessudha. ====== # BBIO - (Fulbaana 7/2017)-Oromiyaatti fandii qabeenya bishaanii cimsuun fedhiifi fayyadamummaa ummataa gama tajaajila bishaanitiin qabu mirkaneessuuf hojjechaa jira. Hojii kana milkeessuuf qajeelfama hundeeffama fandii qabeenya bishaaniirratti qooda fudhattoota waliin mariin gaggeeffamuu eegale itti fufee adeemsifamaa jira. Haaluma kanaan Godiinaa Arsiittii Wajjiirrii Bishaanii fi Inarjii Godiinaa Hundeeffamaa Fandii Qabeenyaa Bishaanii godiiniichaa irrattii Hoggansaa seektarootaa miseensaa boordii Fandii Qabeenyaa Bishaanii Aanaalee fi Godiinaa, Manajimeentii dhabbiilee tajaajiilootaa bishaan Dhugaatii godiiniichaa fi qaamoolee qoodaa fudhatootaa garagaraa waliin tibbana marii gaggeessee jira. Marii kanaa irrattii Biiroo Bishaaniifi Inarjii Oromiyaatti Dareektarri Daarektooreetii fandii Qabeenyaa Bishaanii Obboo Abaadiir Haajii argamuun barbaachisummaa fandichaafi akkaataa hojiirra oolmaa qajeelfamichaarratti hubannoo kennaniiru. Hojiiwwan misooma qabeenya bishaanii humna Mootummaa qofaan raawwachuun fedhii ummataa dabalaa deemu guutuun akka hin danda’amne Obbo Abaadir ibsan. BBIO’n Fandii misooma qabeenya bishaanii qopheessuun maddi faayinaansii dhaabbataan hojiiwwan kanaaf oolu akka jiraatu taasisuun dhimma murteessaa waan ta’eef, Labsii Lakk- 233/2013, Dambii Lakkoofsa 236/2015 fi tarreeffama isaa Qajeelfama 1/2016 bahee irratti hundaa’uun karoora fandii misooma qabeenya bishaanii qopheessee hojiirra oolchaa jira. Bara 2017 keessattis maddoota galii adda addaa irraa Fandiin Bishaanii Qarshii 409, 031,396 walitti qabuuf karoorfamee sochiitti kan galame ta’uu Daarektarichi himan. Leenjiin hubannoo cimsuufi boordii fandii misooma qabeenya bishaanii sadrkaa adda addaatti hundeessuu kanuma faana itti fufee gaggeeffamaa jira. Waltajjii kanarratti I/A Bulchaa Godiinaa Obboo Hirphaa Dhaabaa, IG Ijaarsaa PB Godiinaa Arsii Addee Ra'iisaa Aadaam kan argamu yoo ta'u, gaffii fi fedhii Bishaanii hawaasa keenyaa Dabalaa dhufee deebiisuuf hojiirra oolmaa fandii Qabeenyaa Bishaanii milkeessuuf kan hojjeta7n ta'uu dubbatan. #Bishaan_Lubbuudha! Odeeffannoolee adda addaatiif Marsaalee Hawaasaa keenya sirriitiin nu hordofaa 👇🏽 Telegram ➲ https://t.me/oromiawaterandenergy Facebook ➲ https://www.facebook.com/oromiawaterandenergy Twitter ➲ https://twitter.com/oromiawater_ YouTube ➲ https://www.youtube.com/@oromiawaterandenergy Instagram ➲ https://www.instagram.com/oromiawaterandenergy LinkedIn ➲ https://www.linkedin.com/company/oromiawaterandenergy Website ➲ https://oromiawaterandenergy.org

Haaluma kanaan Ministeeronni Nezerlaand dhufanii pirojekticha eebbisiisuun ’The Miracale Project Of Afrika’ jedhanii Dinqisiifachuun pirojektii biroon akka hojjetamuu fi deggersa kan biraas akka taasisaniif waadaa galan jedhu Inj. Dhaabaan. Ergasii as dhaabbanni taj.bish.dhug.fi dhangala’aa magaalaa Amboo ’World bank’ irraa liqaa akka argatuuf Dhiibbaa uuman. Kanaan pirojektii guddaa akka hojjennuuf ’Action plane qophaa’ee mirkanaa’uun pirojektiin Guddaan qarshii Miiliyoona 142 liqaan argame. Liqaan sunis haqameera. Pirojektichis yeroo ammaa adeemsa irra jiraachuu hoji geggeessaan kun ibsan. Kutaa 2ffaan itti fufa....... Odeeffannoolee adda addaatiif Marsaalee Hawaasaa keenya sirriitiin nu hordofaa Telegram ➲ https://t.me/oromiawaterandenergy Facebook Oromia Water and Energy Bureaugy Twitter ➲ https://twitter.com/oromiawater_ YouTube ➲ https://www.youtube.com/@oromiawaterandenergy Instagram ➲ https://www.instagram.com/oromiawaterandenergy LinkedIn ➲ https://www.linkedin.com/company/oromiawaterandenergy Website ➲ https://oromiawaterandenergy.org

Imala Dhaabbata Tajaajila Bishaan Dhugaatii fi Dhangala’aa Magaalaa Amboo- ======-(Kutaa 1ffaa) #BBIO-Fulbaana 6/2017 Magaalaan Amboo teessoo Bulchiinsa Godina Shawaa Lixaati. Finfinnee irraa km 106 gara lixaatti faggaattee argamti. Baayyinni uummata magaala Amboo akka ragaan Waajjira Karooraafi Misoom Dinagdee Bulchiinsa Magaalaa Amboo irraa argame mul’isutti guddina giddu galaan “ growth rate ‘ tti deemaa jiruun 2.4 yoo ta’u bara 2016 tti 166,103 akka ta’u tilmaamama. Dhaabbanni tajaajila bishaan dhugaatii Magaalaa Amboo bara 1944 yeroo Mootummaan bara sanaa Masaraa mootummaa Magaalaa kana keessatti dhaabbatee turetti, bishaan waan hin jirreef laga Talttallee jedhamu irraa bo’oodhaan jallifamee akka jallisiitti Masaraa Mootii yeroo sanaatti bishaan gale. Sababa kanaaf jecha Bara 1945 Dhaabbanni taj. bish. dhug. fi dhangala’aa Magaalaa Amboo hundeefame. Bara 1946 biyyoota akka xaaliyaaniifi Ingilizii irraa keessummoonni masaraa mootummaa yeroo sanaa daawwachuuf gara Amboo dhufan. Yeroo sana keessummooni alarraa dhufan kunneen bishaan Jallisiidhaan Masaraatti galee jiru argan. Yeroo sana teekinoloojiin Masaraa mootummaa kessatti hin babbalanne waan ta’eef arganii sarara Ujummoo bishaanii galchuuf waadaa galaniifii gara biyyasaanii galan. Waadaa galan sanas kabajuun Ogeessa ujummoo bishaan diriisrsuufi baasii barbaachisu hunda guutuun laga Taltallee irraa sarari km 3 hojjechuun tajaajiluu eegale jedhu Hoji Gaggeessaan Dhaabbatichaa Inj. Dhaabaa Araarsaa. Akka Inj. Dhaabaan himanitti, bara 1946 irraa eegalee hanga bara 1950 tti uummanni bishaan bilisaan akka dhugu Mootii yerosii irraa ajaji darbe. Erga uummanni xiqqoo irraa fayyadamee booda suphaa meeshaalee bishaanitiif baasiin waan barbaachisuuf ummanni bishaan fayyadamu meetirkuubii tokkotti saantima digdamii shan(sumuunii) akka kaffalu murtaa’e. Ummanni bishaan keenya kan uumamaa waaqni nuuf kennetti gatii hin kaffalu jedhaniii mormii kaasan; Mootiin Haayila Silaasee ummata walitti qabee kaffaltiin kaffaltan bishaanuma keessantu ittiin isiniif suphama; waan haaraatti ittiin isinii ceesifna jedhee amansiisee tole jechisiise. Bara 1960 bishaan hojjetame akka qulqulleefamu taasifame hanga bara 1970tti boonoowwan 2n ummata kuma 5 hin caalleef tajaajilaa ture. Yeros namni boombaatti waan hin madaqneef kadhatamanii boonoo akka fayyadaman taasifama ture. Yeroo sana bishaan galchuuf qarshii 15 qofa kaffalamee manatti galchama. Bara 1970 irraa eegalee ’Bartaa konistraction’ (GTZ)kan jedhamuun akka haaraatti pirojektii bishaanii dhugaatii liqaa baankii biyya Jarman irraa argameen qarshii miliyoona 5n boolli bishaanii tokko hojjetame. Kunis hanga 1980 tti tajaajilee rakkoo adda addaaf saaxilame. Sana booda bara 1990 keessa Biiroon Bishaanii fi Inarjii Oromiyaa bool’a 1 qote. Sunis erga qotamee baayinni uummataas dabalaa fedhiin namni bishaan galchachuuf qabus dabalaa waan dhufeef hanqinni bishaanii muudataa dhufe. Rakkoo bishaanii kana hiikuuf tajaajilli bishaan dhugaatii fi dhangala’aa Magaalaa Amboo bara 2000 keessa dabalataan boolla tokko qotee itti dabaluun uummanni irraa fayyadamuu eegale. Fedhiin namoonni bishaan manaa manattiu galchachuuf qaban daran waan dabaleef karoora barkumee galmaan gahuuf jedhamee qabameen dhaabbatichi karaa interneetiin biyyoota Bishaan irratti deggersa godhu jedhaman kanneen akka Nezerlaandii, Engliz, Suweden deggersa akka kennaniif xalayaadhaan gaafataman. Kanneen gaafataman keessaa Nezerlaand hanqina bishaanii jiru irratti deggersa akka godhan fedhii agarsiisuun dhufanii magaalattii keessa rakkoo bishaanii jiru adda baasanii qarshii miliyoona 5 rammadaniin turtii ji’a 1 hin caale keessatti bool’i 1 qotamee, sarari Km.10 babballifame, Boonoon 12 hojjetame bishaan uumataaf kennamuu eegale. Biyyi Nezerlandis deggersa taasisaniin pirojektiin ji’a 1 gidduutti xumurame waan isaan raajeef, gaazexeessaa tokkoo fi ogeessa isaanii tokko erganii ilaalchisan. Isaanis ilaalanii pirjektichi sirnaan yeroo jedhametti xumuramuu isaa erga itti himanii booda, yeroo eebba isaa irratti nama 200 akka dhufan afeeraman.

#Bishaan- bu'uura jireenya lubbu qabeeyyii maraa! ====== #BBIO-Fulbaana 1/bara 2017, Finfinnee)- Bishaan jireenya lubbu qabeeyyii maraaf bu’uura. Ilmi namaa wayita dhalatus ta’e wayita addunyaa kanarraa godaanu bishaan fayyadama. Wantoota jiruuf jireenya ilma namaa keessatti murteessaa ta’an nyaata, uffata/huccuufi mana jireenyaa akka ta’e ol ka’ee himama. Nyaata: Nyaanni jireenyaaf bu’uura. Nyaata madaalawaa nyaachuun fayyaafi guddinaaf murteessaadha Uffata: Uffanni qaama keenya qilleensa, ho’aa, fi qorraa irraa eeguuf murteessaadha. Mana Jireenyaa: Mana jireenyaa qabaachuun nageenya, tasgabbiifi boqonnaa argachuuf murteessaadha. Manneen jireenyaa bakka itti boqonnaa argannu, nyaannu, fi jireenya keenya keessatti hojiiwwan adda addaa raawwannu dha. Wantoota kanaan ala, jireenya keessatti nageenyi, fayyaan, barnoonni, fi hawaasni jireenya gaarii jiraachuuf murteessaadha. Haata’u malee Bishaan malee nyaanni eessaa dhufa? Bishaan malee waantoonni nyaataf, uffannaafis ta’ee mana itti jiraannu horachuuf nu gargaaran eessaa argamu? Ilma namaa dabalatee lubbu qabeeyyiin lafa kanarratti uumaman bishaan malee jiraatuu? Uumama uumaan nu badhaase heddu keessaa bishaan kan gahu hin jiru. Lubbu qabeeyyii kamiifu bishaan murteessaadha. Kanaaf #bishaan_lubbuudha” kan jedhamuufi. Uumamuu lubbu qabeeyyii maraafuu bishaan isa duraa ta’uu irratti yoo waliigalle wantoota jireenya ilma namaatiif bu’uura jennee tarreessine keessaa bishaan ta’uu waan dagatame fakkaata. Nyaata keessatti kan ramadamu yoo ta’es faayidaafi barbaachisummaa bishaanii waan xiqqeessine fakkaata. Bishaan malee nyaanni, uffanni, manni jireenyaa, misoomnifi guddinni kamuu hin jiru. Bishaan dhugaatiifi nyaataaf, qulqulliinaaf, oomisha qonnaatiif, turiizimiif, miidhaginaaf, ijaarsaaf, walumaagalatti jiruufi jireenya keenya keessatti gita ittiin dorgomu hin qabu. Kanaafi fedhiin bu’uuraalee misoomaa inni sadarkaa duraatti ummanni barbaadu keessaa inni tokko Bishaan dhugaatii kan ta’eef. Fedhiifi gaaffiin dhiheessii tajaajila bishaan dhugaatii qulqulluu hawaasni keenya qabu yeroo ammaa sadrkaa olaanaan dabalaa dhufeera. Mootummaan fedhiifi gaaffii kana keessummeessuuf hojii bal’aa hojjechaa tureera, ammas xiyyeeffannoo olaanaa kennuun hojjechaa jira. Biiroon Bishaaniifi Inarjii Oromiyaa Qabeenya bishaanii fi Inarjii naannoon keenya qabu qorannoon adda baasuu, kunuunsuu fi bulchuu, bishaan dhugaatii qulqulluu, gahaafi itti fufiinsa qabu hawaasaaf dhiyeessuu, sirna bulchiinsa iskiimotaa hammayyeessuu akkasumas misooma inarjii babal’isuun guddina hawaas-dinagdee naannichaa mirkaneessuuf hojii bal’aa hojjechaa jira. Ergamootaafi kaayyoo gurguddoo milkeessuuf xiyyeeffannoon hojjechaa jiru keessaa tokko bishaan dhugaatii qulqulluu, gahaafi itti fufiinsa qabu hawaasaaf dhiheessuun fayyadamummaasaa mirkaneessudha. Bu’uuruma kanaan Imaammataafi tarsiimoo bulchiinsa qabeenya bishaanii hojiirra oolchuufi sirna kenniinsa tajaajila bishaan dhugaatiifi dhangala’aa hammayyaa’aa, dhaqqabamaafi si’ataa ta’e diriirsuun hojii bal'aa hojjechaa jira. Kenniinsa tajaajila bishaan dhugaatiifi dhangala’aa keessatti qorannoo irraa eegalee sadarkaa hundatti hirmaannaan kallattii itti fayyadamtootaa akka jiraatuufi dhaabbileen yookiin waldaaleen tajaajila bishaan dhugaatiifi dhangala’aa haala haqa qabeessaafi ittifufiinsa qabuun tajaajila akka kennan taasisuun waan barbaachiseef Labsiin Tajaajila Bishaan Dhugaatiifi Dhangala’aa Naannoo Oromiyaa Murteessuuf Bahe, Lakkoofsi 228/2012 baasee hojiirra oolcheera. Akkaataa lambsii kanaatiin Hawaasni dhaabbilee yookiin waldaalee tajaajila bishaanii magaalaafi baadiyyaa abbummaadhaan akka bulchuufi dhaabbileen yookiin waldaaleen kunis of danda’anii akka bulan tooftaa dandeessisu diriirsuun dhiyeessiin bishaan dhugaatii amansiisaafi ittifufiinsa akka qabaatu taasisuuf caasaa ittigaafatamummaa qabu diriirsuufi gurmaa’insa isaanii sirreessuun barbaachisaa ta’uun tumameera.

Obbo Tolaan gabaasa isaanii keessatti hojiilee akka ciminaatti dhaabbatichi bara 2016 keessatti raawwateefi hanqinoota jiran tarreeffamaan dhiheessaniiru. Keessattuu kenna tajaajilaatiin walqabatee kallattii sosochii kenna tajaajilaa Biiroon kaa’e bu’uura godhachuun hojii bal’aa hojjechaa jiraachuu ibsaniiru. Tajaajilli kennamu karaa ammayyaa’een sirni tekinooloojitti fayyadamuun si’ataa, qulqulluufi qaqqabamaa akka ta’u hojiirra ooluus ibsan. Akka Hoji Gaggeessan ibsanitti, fedhiifi gaaffii ummanni Magaalichaa waliin gahiinsa tajaajila bishaan dhugaatii waliin walqabatu deebisuuf tattaaffii bal’aan taasifamaa jira. Dhaabbatichi dameelee tajaajila bishaan dhugaatii shan qaburratti dhiheessii bishaan dhugaatii karaa haqa qabeessa ta’een dhiheessuuf hojjechaa jiraatullee hanqinni jiraachuu himan. Sababoonni hanqina kana uumanis qisaasama bishaanii, seeraan alummaa bishaanirratti raawwatamuufi biqiltuu baargamoo madddeen bishaanirratti dhaabuun isaan ijoodha jedhan. Rakkoolee kanneen furuuf ammoo tarkaanfii sirreessaa fudhachuuf dameelee shanan irratti marii gaggeeffameen irratti walii galamuu himuun karoora bara 2017 keessatti kan raawwatamu ta’a jedhan. Dhimmoota kenna tajaajilaafi bulchiinsa gaarii waliin walqabatee jiru hirmaannaa ummataatiin tarkaanfiin seeraafi bulchiinsaa fudhatamuun riifoormiin eegalame akka lafa qabatu ciminaan ni hojjetama jedhan. Hirmaattonni fooramichaas gama isaanitiin yaada kaasaniin, Dhaabbatichi tajaajilasaa haqa qabeessaafi fedhii hawaasaa guutuuf tattaaffii gochaa jiru dinqisiifataniiru. Hanqina bishaan dhugaatii qaban furuuf Abbootiin qabeenyaa, ummanniifi qooda fudhattoonni qindoominaan yoo hojjetan ta’uus himan. Dhimmoota akka hanqinaatti ka’anis hirmaannaa isaanitiin akka furamu gahee isaanii bahachuuf mirkaneessaniiru. Bulchaan Bulchiinsa Godina Arsii Obbo Ibraahiim Kadir waltajjicharrattii argamuun kallattii kaa’aniin, dhimmoota kenna tajaajilaa, maddoota bishaanii kunuunsuu, seeraan alummaafi qisaasama bishaaniin walqabatan furuu keessatti deggarsaafi hordoffii barbaachisu kan taasisan ta’uu dubbataniiru. Pirojektoota dhaabbatichi jalqabee of harkaa qabu xumursiisuufi hanqina bishaanii jiru hundeerraa furuuf qorannoon akka gaggeeffamu kallattii kaa’an. Haaluma walfakkaatuun fooramiin kun Dhaabbata Tajaajila Bishaan Dhugaatii Magaala Hoolotaa-Ejereettis gaggeeffameera. Hoji Gaggeessaan Dhaabbatichaa Obbo Dabalaa Kuusaa gabaasa raawwii hojii bara darbeefi karoora hojii bara 2017 dhiheessan keessatti rakkoo Bishaan Dhugaatii Magaalichatti mul’atu qindoomina qooda fudhattootaafi humna qabuun furuuf hojjechaa jiraachuu ibsan. Qindoomina dhaabbataafi Mamilaa cimisuun alseerummaa bishaan dhugaatii irratii jiru araarama tokko malee tarkaaffii sirreeffamaa fudhachuufi haricaatii sassaabbii galii dhabbatichaa irratti mul’atu maqsuuf karoorfamuusaa obbo Dabalaan himan. Waltajjii kanarratti bakka Bu’aan BBIO fi Dura taa’aan boordii dhaabbatichaa Dr. Xibabuu Taliilaa akkasumas qooda fudhattoonni biroo argamaniiru. #Bishaan_ bu’uura jireenya lubbu qabeeyyii maraa waan ta’eef kunuunsinee itti haa fayyadamnuun dhaamsa qophichaati. Odeeffannoolee adda addaatiif Marsaalee Hawaasaa keenya sirriitiin nu hordofaa Telegram ➲ https://t.me/oromiawaterandenergy Facebook Oromia Water and Energy Bureaugy Twitter ➲ https://twitter.com/oromiawater_ YouTube ➲ https://www.youtube.com/@oromiawaterandenergy Instagram ➲ https://www.instagram.com/oromiawaterandenergy LinkedIn ➲ https://www.linkedin.com/company/oromiawaterandenergy Website ➲ https://oromiawaterandenergy.org

Labsiin kun Aangoofi gahee hojii Dhaabbilee Bishaaniifi dhangala’aa sadarkaan jiranii murteesseera. Haaluma kanaan dhaabbileen tajaajiloota bishaan dhugaatiifi dhangala’aa Imaammata, tarsiimoo, sagantaaleefi seerota bishaan dhugaatiifi dhangala’aa hojiirra ni oolchu; Magaalaa pilaanii qabu keessatti pilaanii irratti bu’uureffatanii ijaarsa bishaanii ni gaggeessu yookiin sarara maqsa dhanga la’aa ni diriirsu; Magaalaa Pilaanii hin qabne keessatti qaama Bulchiinsa Aanaa yookiin Magaalaa waliin waliigaltee taasisuun ijaarsa bishaanii ni gaggeessu yookiin sarara maqsa dhangala’aa akka diriirsan tumameera. Bishaan dhugaatii sadarkaa qulqullina isaa eeggate, gahaafi amansiisaa ta’e hawaasa magaalaafi naannawa magaalichaa jiraatu yookiin baadiyyaa gandoota hedduuf ni dhiyeessau; Tajaajila kennan babal’isuuf maddoota galii adda addaa ni barbaadu; akka barbaachisummaa isaatti baasiin investimantii tajaajila bishaan dhugaatiifi dhangala’aa hawaasaan akka deeggaramu ni jajjabeessu. Namoota tajaajila bishaan dhugaatii gaafatan haalli dirqisisaan yoo qunname malee akkaataa tartiiba gaaffii isaaniitiin sarara bishaanii ni diriirsu; ni suphu; ni babal’isu; waliigaltee ni seenu; ni haaromsu; ni fooyyeessu; Namoota harka qalleeyyii ta’aniif liqiidhaan yookiin tooftaalee mijataa ta’aniin bishaan akka galfatan ni deeggaru. Kana malees dhaabbileen Tajaajiloota Bishaan Dhugaatiifi Dhangala’aa aangoo qabeenya horachuufi Investmantii keessa galuu dabalatee kanneen biroo kennameefii jira. Labsii kana hojiirra oolchufis Dambii Lakkoofsa 222/2013 Labsii Tajaajila Bishaan Dhugaatii fi Dhangala’aa Naannoo Oromiyaa raawwachiisuuf bahee hojiirra oolee jira. Rifoormii sktaricha keessatti gaggeeffame bu’uura godhachuun Dhaabbilee Tajaajila Bishaan Dhugaatiifi Dhangala’aa sadrkaa 1ffaa addaatii hanga sadrkaa 5ffaatti bifa haaraadhaan labsiin gurmaa’an keessaa Dhaabbileen Tajaajila Bishaan Dhugaatiifi Dhangala’aa Magaalota Hurutaa Heexossa Dheeraafi Hoolotaa-Ejereeti. Dhaabbileen lameenuu tibbana Fooramii Maamilaa gaggeeffataniiru. Kaayyoon Fooramii kanaas tajaajilaa dhaabbileen kunneen hawaasaaf kennan, akkasumas raawwiifi karoora hojii bara 2016 fi 2017 irratti mari’achuun ciminootaafi hanqinoota jiran adda baasuudha. Ciminoota jiran itti fufsiisuufi hanqinoota dhaabbileen qaban fuulaafi fuulatti kaasuun kallattii furmaataa kaa’uudha. Erga fooramiin maamilaa kun gaggeeffamuu eegalee as rakkooleen kenna tajaajilaatiin walqabatan ammallee hojii bal’aa kan gaafatan ta’ullee, sadrkaa sadrkaan furamaa dhufuusaa bakka bu’oonni maamilaafi qooda fudhattoonni waltajjii kanarratti hirmaatan ragaa bahaniiru. Biiroon Bishaanifi Inarjii Oromiyaa rakkoolee kenna tajaajilaa dhaabbilee tajaajila Bishaan Dhugaatiifi Dhangala’aa keessatti mul’atu furuuf bara kana sosochii keessa galeera. Biirichatti Daarektarri Daarektooreetii Bulchiinsa Dhaabbilee Bishaan Dhugaatii Magaalotaa Obbo Jabal Abbaa Fiixaa Qorannoo hanqina kenna tajaajilaa irratti akka biyyoolessaatti gaggeeffameen seektaroota qorannichi irraatti taasifame 8 keessaa tokko dhabbiilee tajaajila bishaan dhugaatiifi dhangala'aa magaalootaa ta’uu waltajjii kanarratti ibsaniiru. Bu'uuruma kanaan Biirichi tibba darbe caasaa isaa sadrkaa Godinaaleefi Dhaabbilee Tajaajila Bishaan dhugaatiifi Dhangal’aa waliin marii gaggeessuun rakkoolee kenna tajaajilaatiin walqabatee qorannoon adda bahe maqsuuf sosochiin sadarkaa hundatti akka gaggeeffamu irratti walii galamee sosochiin sadrkaa adda addaatti gaggeeffamaa jira jedhan. Hawaasni tajaajila bishaan dhugaatii qulqulluu argachuun mirga sadrkaa mootummoota gamtoomaniitti eegamedha waan ta’eef tajaajila haqa qabeessa akka argatu gochuuf hojiin eegalame cimee akka itti fufu dhaaman. Hoji-gaggeessaan Dhaabbata Tajaajila Bishaan Dhugaatiifi Dhangala’aa Magaalaa Hurutaa Heexossa Dheeraa Obbo Tolaa Nagaash gabaasa raawwii hojii bara 2016 fi kallattii karoora bara 2017 bakka Bulchaan Bulchiinsa Godina Arsii Obbo Ibraahiim Kadir, keessummoonnifi qooda fudahttoonni argamanitti fooramichaaf dhiheessaniiru.

Ergaa Baga Geessanii ===== Hoggantuun Biiroo Bishaaniifi Inarjii Oromiyaa Inj. Miliyoon Baqqalaa Ummata Oromoofi lammiilee Itoophiyaa biyya keessaafi biyya ormaa jiran maraan, ergaa baga nagayaan geessanii kan bara haaraa 2017 dabarsanii jiru. ======== Inj. Miliyoon ergaa dabarsaniin Ummata Oromoo fi lammiilee biyyattiifi guutuu Addunyaa irratti argamaniif Ayyaana bara haaraa sababeeffachuun ergaa dabarsaniin akka jedhanitti, Birraan mallattoo Abdii,ifaafi injifannoo waan ta'eef, Oromoon bara durii eegalee, Birraan yoo bari'u waaqa bacaqii gannaa isa ceesise galateeffataa, Karooraafi imala jireenya isaa kan darbe irraa barachaafi bara haaraaf waan addaa hojjachuuf of qopheessaa akkasumas firaafi aantee isaatif abdii fi hawwii qabu kan ittiin waliif ibsuudha. Kanaafuu barri dhufaa jiru kun kan karoora keenya itti haareffannu, waan eegalle kan ittiin xumurru, waadaa ummataaf galle kan itti milkeessinu,hojii caalmaafi tajaajila hawaasaa fooyya'e kan itti galmeessinu, badhaadhina Maatiifi biyyaa eegalamee kan ittiin lafa qabsiifnu akkasumas haaluma Mootummaan Naannoo keenyaa gadi fageenyaan irratti hojjachaa jiruun, araaraafi nagaya buusuun qe'ee Oromoo rakkoofi gadadoo irraa kan ittiin fageessinu akka ta'uufi walumaagalatti barri haaraan 2017, bara nagayaa,jaalalaa,gammachuufi badhaadhinaa akka ta'u hawwii isaanii dabarsanii jiru. Odeeffannoolee adda addaatiif Marsaalee Hawaasaa keenya sirriitiin nu hordofaa Telegram ➲ https://t.me/oromiawaterandenergy Facebook Oromia Water and Energy Bureaugy Twitter ➲ https://twitter.com/oromiawater_ YouTube ➲ https://www.youtube.com/@oromiawaterandenergy Instagram ➲ https://www.instagram.com/oromiawaterandenergy LinkedIn ➲ https://www.linkedin.com/company/oromiawaterandenergy Website ➲ https://oromiawaterandenergy.org