Літархіў

📸 Стары здымак На фотаздымку 1963 г. пісьменнікі: Мікола Хведаровіч, ?, Янка Брыль, ?, Ян Скрыган. #здымак

📅 60 гадоў таму памёр Язэп Пушча На здымку магіла пісьменніка Язэпа Пушчы (1902-1964) у в. Каралішчавічы Мінскага раёна. Пахаванне месціцца ў зарослым кутку старой часткі вясковых могілак. У 1996 г. да яго падхаваная жонка Станіслава, што перажыла мужа больш чым на 30 гадоў. #здымак

📘 Вокладка "Негарэльская арка" Анатоль Вялюгін (1923-1994). Гэта другі зборнік паэзіі маладога пісьменніка, што выйшаў у сталіжным "Белдзяржвыдавецтве" у 1949 г. Дэбютны - "Салют у Мінску" быў надрукаваны ў 1947 г.🧐 #вокладка

📸 Старое фота Янка Запруднік і Адам Мальдзіс у Маладэчне. Першы візіт сп. Запрудніка на Радзіму пасля дзясяткаў гадоў эміграцыі. 1992 год #здымак

📸 Стары здымак Актыў наваполацкага аб'яднання "Крыніцы". На фота можна пазнаць Сержука Сокалава-Воюша, Уладзімера Арлова, Лявона Баршчэўскага, Ірыну Жарнасек. (Здымак 1990-ых гг. з архіву І. Жарнасек). Даведка: У Полацку і Наваполацку ў канцы 1980-ых пачатку 1990-ых існавала і актыўна дзейнічала беларускае культурніцкае кола, цэнтрам якога было літаратурнае аб’яднанне "Крыніцы". Апроч літаратуры чальцы сябрыны займаліся вывучэннем краю, друкам самвыдату, стварэннем беларускіх гурткоў і інш. #здымак

Янка Сіпакоў Здымак пісьменніка Янкі Сіпакова (1936-2011) з асабовай справы, аўтабіяграфія і рэкамендацыя на ўступленне ў СП БССР ад Рыгора Барадуліна - усё датуецца 1961 г. У краіне саветаў разгар Адлігі і ў літаратуру прыходзяць новыя яркія творцы. p.s. Але які файны гальштук! 😉 #архіў

📸 Стары здымак Пісьменнік Іван Чыгрынаў. Пачатак 1960-х гг. #здымак

Цытата "Музыка нашых лясоў мілагучнасцю строгай вуху і сэрцу мілей за літаўру і ліру". Мікола Гусоўскі (“Песня пра зубра”) #цытата

Няма Труса Так проста, жорстка і сталёва Чыясьці моцная рука Ударыла... І труцяць словы: «Няма Труса...» І вось - Алеся сірацее, На быльнягу слязьмі раса... Далёка гусі адляцелі - Няма Труса... Так проста, жорстка і сталёва... Увосень - падае краса... І труцяць сэрца злыя словы: «Няма Труса...» 01.09.1929, Менск Юлі Таўбін Даведка: Паэт, сябра літаратурнага аб’яднання «Маладняк», Паўлю́к Трус нарадзіўся 6 мая 1904, в. Нізок, Мінскай вобл. — 30 жніўня 1929, Менск). Памёр ад тыфа ва ўзросце 25 гадоў. #прысвячэнне

📸 Стары здымак Злева направа: Міхась Стральцоў, Мікола Прашковіч, Мікола Капыловіч. Менск, парк імя М. Горкага, канец 1960-х гг. (З фондаў БДАМЛМ). #здымак