خواطر د/حازم عبدالتواب

ماتنساش: قُلْ إِنَّ الْفَضْلَ بِيَدِ اللَّهِ يُؤْتِيهِ مَن يَشَاءُ وما تنساش: وَلَقَدْ مَنَنَّا عَلَيْكَ مَرَّةً أُخْرَىٰ وماتنساش: وَرَحْمَتِي وَسِعَتْ كُلَّ شَيْءٍ وماتنساش: فَرِحِينَ بِمَا آتَاهُمُ اللَّهُ مِنْ فَضْلِهِ وماتنساش أخيرًا: وَلَٰكِنَّ أَكْثَرَ النَّاسِ لَا يَشْكُرُونَ فأرجوك خليك من القلّة الشاكرة لنعم الله وما أكثر هذه النعم. #خواطر_قد_تصل

الشغف عكس الانضباط تمامًا الشغف يخليك تعمل اللي انت بتحبه بس الانضباط يخليك تعمل اللي انت مش بتحبه بنفس القدر من المسؤولية زي ما تكون بتحبه الشغف لا يصنع نجاحًا بل يصنع سعادة مؤقتة الانضباط يصنع النجاح ويصنع بعده السعادة المستمرة #خواطر_قد_تصل

رحت بدري شوية النهارده قبل عيادة قصر العيني بقالي كتير اوي ما دخلتش كافيتريا أعضاء هيئة التدريس من سنين طويلة كنا مسميينها كافيتيريا عم مصطفى على اسم الراجل الطيب اللي كان بيقدملنا الحاجات السخنة والساندوتشات .. ربنا يرحمه ويغفر له. الواحد كل ما بيدخل ناحية المدرجات وناحية سكشن الاناتومي وسكشن الفسيولوجي بتجيله حالة غريبة من الاستنكار. العمر عدّى .. بسرعة اوي.. فعلًا.. كنت قاعد هنا بذاكر وكنت قاعد هنا متضايق بعد امتحان وكنت قاعد هناك مع أصحابي . الدنيا بتجري يا جماعة خدوا بالكم.. مفيش حاجة في الدنيا تستاهل الحزن والكمد والوحدة. بكلمكم من مستقبلكم.. اشتغل بجد.. اختار صُحبة حلوة.. اوعى دينك يضيع منك. #خواطر_قد_تصل

من نعم ربنا عليك يكون جنبك واحد كويس شايفك وبيساعدك ومش سايبك لأفكارك السيئة لا تُنْسى

وانت بتبدأ عامك الدراسي اوعد نفسك تتغيّر للأفضل ١- ما تضيعش وقت ٢- ما تصاحبش حد وحش ٣- خد بالك من اولويات مستقبلك ٤- نبطّل علاقات حرام ٥- ننوي نتعلم عشان ربنا أمرنا بالعلم ٦- ارفع رأس أهلك ٧- مفيش اكتئاب ولا احباط ولا يأس ٨- اغلط بس اجري صلّح غلطك ٩- ركّز اوي مين بيحبك واوعاك تخذله ١٠- الدنيا منافسة واللي بيجتهد ربنا بيجعله فيها نصيب فاوعد نفسك تتغير عشانك انت ، عشان نفسك قبل اي حد تاني #خواطر_قد_تصل

ربنا ممكن يغيّر حالك من حال إلى حال في لحظة ممكن تكون إنسان غير موفّق فربنا يكرمك ويكتب لك النجاح. ممكن تكون مش محبوب وسط اللي حواليك فربّنا يكرمك بصحبة تانية ترد الروح. ممكن تكون بتعافر ومش عارف توصل فربنا فجأة يسخّر لك الطريق وكل اللي فيه عشان يساعدوك. ممكن تكون على أد حالك فربّنا يفتح عليك أبواب رزق عمرك ما حلمت بيها. اُصْدُق مع الله يفتح لك كل الأبواب المغلقة ويغيّر حالك من حال المحاولة إلى حال الوصول. #خواطر_قد_تصل

اسمع منّي ١- ابني نفسك متستناش حد يزقك. ٢- عادي تقابلنا صعوبات وانكسارات ، دي دنيا و لازم نستحملها. ٣- اما بنتعب لازم نقف شوية ونعد النعم اللي بالفعل معانا. ٤- المنافسة مش شريفة في الأغلب ، و لازم نتعود على عكس كده. ٥- نساعد الناس تمام، نعطّل نفسنا مش تمام. ٦- الناس مش بتشكر (في الغالب) ، خلى نيّتك ربنا. ٧- اعمل حساب المفاجأة طالما في تلميحات او احساس بالخيانة. ٨- الموجة العالية ممكن تغرقنا لو مش عاملين حسابها لكن الموجة اللي شايفينها مهما كانت عالية ممكن نتخطاها او ننزل لما تعدي. ٩- مش من الذكاء المواجهة بغباء، الصمت والحيلة عشان الحق يرجع. ١٠- بلاش نعيش نظرية المؤامرة لانها كده كده موجودة، والضحية طول ما هو عارف انه ضحية هيتّاكل. #خواطر_قد_تصل

في رابط مشترك في تحوّل الحال في اكتر من حد حوالينا حد كان كويس بقى وحش حد كان معاه فلوس اتزنق حد كان معاه بيت واتحرم منه العين حق.. العين حق اللهم إنا نعوذ بك من شرّ عينٍ لا تقول (تبارك الله) حين ترى النعمة على غيرها #خواطر_قد_تصل

زي ما الصحبة الطيبة بتخلي النفس مفتوحة برضه الصحبة السيئة بتغمّ النفس #خواطر_قد_تصل

ما ينفعش في أي علاقة تعمل تلات حاجات ١- تتعشّم بزيادة ٢- تثق بهبل ٣- ترجع بعد ما اتخلّوا عنك #خواطر_قد_تصل