Books' Horizon~የመጻሕፍት አድማስ📚

"እጅግ በጣም በጣም አስፈላጊና ጠቃሚ መጽሐፍ " ይህ መጽሐፍ ሥነ አመክንዮን ( Logic ) በአማርኛ ቋንቋ በጣም ውብ በሆነ የስነጽሑፍ ችሎታ የሚያስተምር በተለያዩ ዋቢ መጽሐፍት የታጀበ አጃኢብ የሆነ መጽሐፍ ነው። ይህ መጽሐፍ ለአማርኛ ቋንቋ መዳበርና ማደግ ካለው አስተዋጽኦ በተጨማሪ ፣ በየትኛውም ደረጃ ላይ ያለን የትኛውንም የትምህርት ዘርፍ ፣ በራሳችን ቋንቋ አዘጋጅተን መማርና ማስተማር እንደሚቻል ካስመሰከሩትና መንገድ ከጠረጉት መጽሐፎች ውስጥ አንደኛውና ምሳሌ ሊሆን የሚችል ኮስተር ያለ ሥራ ነው። መጽሐፉ ለፍልስፍና ተማሪዎች፣ ለሕግና ከሕግ ጋር ተዛማጅነት ያላቸውን ሥራዎች ለሚሠሩ ሰዎች፣ ለዐቅብተ እምነት አገልጋዮች እንዲሁም ለነገረ መለኮት መምህራንና ሰባኪያን እጅግ ትልቅ ጠቀሜታ ያለው በተለያዩ ዋቢ መጽሐፎችና መጠቁሞች የታጀበ ጠብሰቅ ያለ ሥራ ነው። እንደሚታወቀው ሥነ አመክንዮ እውነትን ከስሕተት፣ ሠናዩን ከእኵይ የምንለይበት መሣሪያ ነው፡፡ የዕደ ጥበብ ባለሙያዎች የተዛነፈውን፣ የጐደለውን፣ ያሞጠሞጠውን የሚለዩበትና የሚወቅሩበት መሣሪያ አላቸው (ውሃ ልክ፣ ቱንቢ፣ ገመድ፣ ሜትር፣ ማስመሪያ)፡፡ አለያ ግን ውሃ ልክ የጠበቀ፣ መስመር የተከተለ ጽኑና ውብ ቤት ሊሠሩ አይችሉም፡፡ ሥነ አመክንዮ ዝንፈትን፣ ስሕተትን፣ ተፋልሶን የምንለይበት ብቻ ሳይሆን፤ ዐሳባችንን እንዴት ማደራጀት እንዳለብን የሚያስተምር የትምህርት ዘርፍ ነው፡፡ በዚህ አግባብ ሲታይ ሥነ አመክንዮ በእውነትና በስሕተት መኻል እንዲዳኝ የተሰየመ ዳኛ ነው፡፡ ይህ ደግሞ እያንዳንዱ ሰው የሥነ አመክንዮን ሕግጋት እንደ አሽንክታብ በዐንገቱ እንዲያንጠለጥል፤ በገሐድ በሚያየው ቦታ እንደ ንቅሳት ሊነቀሰው የሚገባ የእውነት ማኅተም ነው ትልቅ ትኵረት ይስጠው ለማለት ነው፡፡ ሥነ አመክንዮ ትክክለኛን ሙግት ትክክለኛ ካልሆነ ሙግት የምንለይበት መርሖና ዘዴ ፣ ምን እንደሆነ የሚያስተምረን የትምህርት ዘርፍ ነው። በሌላ አነጋገር የራስን ሙግት በትክክለኛው መንገድ ለማዋቀር ፣ ሙግትን በትክክል ለመመርመር ( ለመገምገም ) እንዲሁም የክርክርን ጭብጥ በትክክለኛው መንገድ ለመሰተር ("ለማቅረብ ) የሚጠቅሙ መርሖች የሚቀዱበት ፣ ምርምር ዘርፍ ነው ይሉናሉ የመጽሐፉ ጸሐፊ ዶክተር ተስፋዬ ሮበሌ። በተገኘበት የመነበብ እርምጃ ይወሰድበት !"